6 Et vidi quod aperuisset Agnus unum de septem sigillis ; et audivi unum de quatuor animalibus dicens, tanquam vocem tonitrui : Veni, et vide.
Et vidi quod aperuisset agnus unum de septem signaculis et audivi unum de quattuor animalibus dicentem tamquam vocem tonitrui veni.
2 Et vidi, et ecce equus albus ; et qui sedebat super illum habebat arcum, et data est ei corona, et exivit vincens ut vinceret.
Et vidi et ecce equus albus et qui sedebat super illum habebat arcum et data est ei corona et exivit vincens ut vinceret.
3 Et cum aperuisset sigillum secundum, audivi secundum animal dicens : Veni, et vide.
Et cum aperuisset sigillum secundum audivi secundum animal dicens veni.
4 Et exivit alius equus rufus ; et qui sedebat super illum, datum est ei ut sumeret pacem de terra, et ut invicem se interficiant ; et datus est ei gladius magnus.
Et exivit alius equus rufus et qui sedebat super illum datum est ei ut sumeret pacem de terra et ut invicem se interficiant et datus est illi gladius magnus.
5 Et cum aperuisset sigillum tertium, audivi tertium animal, dicens : Veni, et vide. Et ecce equus niger ; et qui sedebat super illum, habebat stateram in manu sua.
Et cum aperuisset sigillum tertium audivi tertium animal dicens veni et vidi et ecce equus niger et qui sedebat super eum habebat stateram in manu sua.
6 Et audivi tanquam vocem in medio quatuor animalium dicentium : Bilibris tritici denario, et tres bilibres hordei denario ; et vinum et oleum ne læseris.
Et audivi tamquam vocem in medio quattuor animalium dicentem bilibris tritici denario et tres bilibres hordei denario et vinum et oleum ne laeseris.
7 Et cum aperuisset sigillum quartum, audivi vocem quarti animalis dicentis : Veni, et vide.
Et cum aperuisset sigillum quartum audivi vocem quarti animalis dicentis veni et vidi.
8 Et ecce equus pallidus ; et qui sedebat super eum, nomen illi Mors, et infernus sequebatur eum ; et data est illi potestas super quatuor partes terræ, interficere gladio, fame, et morte, et bestiis terræ.
Et ecce equus pallidus et qui sedebat desuper nomen illi Mors et inferus sequebatur eum et data est illi potestas super quattuor partes terrae interficere gladio fame et morte et bestiis terrae.
9 Et cum aperuisset sigillum quintum, vidi subtus altare animas interfectorum propter verbum Dei, et propter testimonium quod habebant,
Et cum aperuisset quintum sigillum vidi subtus altare animas interfectorum propter verbum Dei et propter testimonium quod habebant.
10 Et clamabant voce magna, dicentes : Usquequo, Domine (sanctus et verus), non judicas, et non vindicas sanguinem nostrum de iis qui habitant in terra ?
Et clamabant voce magna dicentes usquequo Domine sanctus et verus non iudicas et vindicas sanguinem nostrum de his qui habitant in terra.
11 Et datæ sunt illis singulæ stolæ albæ ; et dictum est illis ut requiescerent adhuc tempus modicum, donec compleantur conservi eorum, et fratres eorum, qui interficiendi sunt sicut et illi.
Et datae sunt illis singulae stolae albae et dictum est illis ut requiescerent tempus adhuc modicum donec impleantur conservi eorum et fratres eorum qui interficiendi sunt sicut et illi.
12 Et vidi cum aperuisset sigillum sextum, et ecce terræ motus magnus factus est, et sol factus est niger tanquam saccus cilicinus, et luna tota facta est sicut sanguis ;
Et vidi cum aperuisset sigillum sextum et terraemotus factus est magnus et sol factus est niger tamquam saccus cilicinus et luna tota facta est sicut sanguis.
13 Et stellæ de cælo ceciderunt super terram, sicut ficus emittit grossos suos cum a vento magno movetur.
Et stellae caeli ceciderunt super terram sicut ficus mittit grossos suos cum vento magno movetur.
14 Et cælum recessit sicut liber involutus, et omnis mons, et insulæ de locis suis motæ sunt,
Et caelum recessit sicut liber involutus et omnis mons et insulae de locis suis motae sunt.
15 Et reges terræ, et principes, et tribuni, et divites, et fortes, et omnis servus, et liber, absconderunt se in speluncis, et in petris montium ;
Et reges terrae et principes et tribuni et divites et fortes et omnis servus et liber absconderunt se in speluncis et petris montium.
16 Et dicunt montibus, et petris : Cadite super nos, et abscondite nos a facie sedentis super thronum, et ab ira Agni,
Et dicunt montibus et petris cadite super nos et abscondite nos a facie sedentis super thronum et ab ira agni.
17 Quoniam venit dies magnus iræ ipsorum ; et quis poterit stare ?
Quoniam venit dies magnus irae ipsorum et quis poterit stare.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org — Nova Vulgata Bibliorum Sacrorum Editio.
