22 Et ostendit mihi fluvium aquæ vitæ, splendidum tanquam crystallum, procedentem de sede Dei et Agni.
Et ostendit mihi fluvium aquae vitae splendidum tamquam cristallum procedentem de sede Dei et agni.
2 In medio plateæ ejus, et ex utraque parte fluminis lignum vitæ, afferens fructus duodecim, per menses singulos reddens fructum suum ; et folia ligni ad sanitatem gentium.
In medio plateae eius et ex utraque parte fluminis lignum vitae adferens fructus duodecim per menses singula reddentia fructum suum et folia ligni ad sanitatem gentium.
3 Et omne maledictum non erit amplius ; sed sedes Dei, et Agni in illa erunt, et servi ejus servient illi.
Et omne maledictum non erit amplius et sedes Dei et agni in illa erunt et servi eius servient illi.
4 Et videbunt faciem ejus, et nomen ejus in frontibus eorum.
Et videbunt faciem eius et nomen eius in frontibus eorum.
5 Et nox ultra non erit ; et non egebunt lumine lucernæ, neque lumine solis, quoniam Dominus Deus illuminabit illos, et regnabunt in sæcula sæculorum.
Et nox ultra non erit et non egebunt lumine lucernae neque lumine solis quoniam Dominus Deus inluminat illos et regnabunt in saecula saeculorum.
6 Et dixit mihi : Hæc verba fidelissima sunt, et vera ; et Dominus Deus spirituum prophetarum misit angelum suum ostendere servis suis quæ oportet fieri cito.
Et dixit mihi haec verba fidelissima et vera sunt et Dominus Deus spirituum prophetarum misit angelum suum ostendere servis suis quae oportet fieri cito.
7 Et ecce venio velociter. Beatus, qui custodit verba prophetiæ libri hujus !
Et ecce venio velociter beatus qui custodit verba prophetiae libri huius.
8 Et ego, Joannes, qui audivi, et vidi hæc ; et postquam audissem, et vidissem, cecidi ut adorarem ante pedes angeli, qui mihi hæc ostendebat ;
Et ego Iohannes qui audivi et vidi haec et postquam audissem et vidissem cecidi ut adorarem ante pedes angeli qui mihi haec ostendebat.
9 Et dixit mihi : Vide ne feceris ; conservus enim tuus sum, et fratrum tuorum prophetarum, et eorum, qui servant verba prophetiæ libri hujus, Deum adora.
Et dicit mihi vide ne feceris conservus tuus sum et fratrum tuorum prophetarum et eorum qui servant verba libri huius Deum adora.
10 Et dicit mihi : Ne signaveris verba prophetiæ libri hujus ; tempus enim prope est.
Et dicit mihi ne signaveris verba prophetiae libri huius tempus enim prope est.
11 Qui nocet, noceat adhuc ; et qui in sordibus est, sordescat adhuc ; et qui justus est, justificetur adhuc ; et sanctus, sanctificetur adhuc.
Qui nocet noceat adhuc et qui in sordibus est sordescat adhuc et iustus iustitiam faciat adhuc et sanctus sanctificetur adhuc.
12 Ecce venio cito, et merces mea mecum est, reddere unicuique secundum opera sua.
Ecce venio cito et merces mea mecum est reddere unicuique secundum opera sua.
13 Ego sum a et w [alpha et omega], primus et novissimus, principium et finis.
Ego α et ω primus et novissimus principium et finis.
14 Beati qui lavant stolas suas in sanguine Agni, ut sit potestas eorum in ligno vitæ, et per portas intrent in civitatem.
Beati qui lavant stolas suas ut sit potestas eorum in ligno vitae et portis intrent in civitatem.
15 Foris canes, et venefici, et impudici, et homicidæ, et idolis servientes, et omnis qui amat et facit mendacium.
Foris canes et venefici et inpudici et homicidae et idolis servientes et omnis qui amat et facit mendacium.
16 Ego, Jesus, misi angelum meum, testificari vobis hæc in Ecclesiis. Ego sum radix, et genus David, stella splendida et matutina.
Ego Iesus misi angelum meum testificari vobis haec in ecclesiis ego sum radix et genus David stella splendida et matutina.
17 Et Spiritus, et Sponsa dicunt : Veni. Et qui audit, dicat : Veni. Et qui sitit, veniat ; et qui vult, accipiat aquam vitæ gratis.
Et Spiritus et sponsa dicunt veni et qui audit dicat veni et qui sitit veniat qui vult accipiat aquam vitae gratis.
18 Contestor enim omni audienti verba prophetiæ libri hujus : Si quis apposuerit ad hæc, apponet Deus super illum plagas scriptas in libro isto.
Contestor ego omni audienti verba prophetiae libri huius si quis adposuerit ad haec adponet Deus super illum plagas scriptas in libro isto.
19 Et si quis diminuerit de verbis libri prophetiæ hujus, auferet Deus partem ejus de libro vitæ, et de civitate sancta, et de his quæ scripta sunt in libro isto.
Et si quis deminuerit de verbis libri prophetiae huius auferet Deus partem eius de ligno vitae et de civitate sancta et de his quae scripta sunt in libro isto.
20 Dicit qui testimonium perhibet istorum : Etiam venio cito. Amen. Veni, Domine Jesu.
Dicit qui testimonium perhibet istorum etiam venio cito amen veni Domine Iesu.
21 Gratia Domini nostri Jesu Christi cum omnibus vobis. Amen.
Gratia Domini nostri Iesu Christi cum omnibus.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org — Nova Vulgata Bibliorum Sacrorum Editio.
