14 Factum est autem Iconii, ut simul introirent synagogam Judæorum, et loquerentur, ita ut crederet Judæorum et Græcorum copiosa multitudo.
Factum est autem Iconii ut simul introirent synagogam Iudaeorum et loquerentur ita ut crederet Iudaeorum et Graecorum copiosa multitudo.
2 Qui vero increduli fuerunt Judæi suscitaverunt, et ad iracundiam concitaverunt animas gentium adversus fratres.
Qui vero increduli fuerunt Iudaei suscitaverunt et ad iracundiam concitaverunt animas gentium adversus fratres.
3 Multo igitur tempore demorati sunt, fiducialiter agentes in Domino, testimonium perhibente verbo gratiæ suæ, dante signa et prodigia fieri per manus eorum.
Multo igitur tempore demorati sunt fiducialiter agentes in Domino testimonium perhibente verbo gratiae suae dante signa et prodigia fieri per manus eorum.
4 Divisa est autem multitudo civitatis, et quidam quidem erant cum Judæis, quidam vero cum apostolis.
Divisa est autem multitudo civitatis et quidam quidem erant cum Iudaeis quidam vero cum apostolis.
5 Cum autem factus esset impetus gentilium et Judæorum cum principibus suis, ut contumeliis afficerent, et lapidarent eos.
Cum autem factus esset impetus gentilium et Iudaeorum cum principibus suis ut contumeliis adficerent et lapidarent eos.
6 Intellegentes confugerunt ad civitates Lycaoniæ Lystram, et Derben, et universam in circuitu regionem,
Intellegentes confugerunt ad civitates Lycaoniae Lystram et Derben et universam in circuitu regionem
7 Et ibi evangelizantes erant.
Et ibi evangelizantes erant.
8 Et quidam vir in Lystris infirmus pedibus sedebat, claudus ex utero matris suæ, qui numquam ambulaverat.
Et quidam vir in Lystris infirmus pedibus sedebat claudus ex utero matris suae qui numquam ambulaverat.
9 Hic audivit Paulum loquentem. Qui intuitus eum, et videns quia haberet fidem ut salvus fieret.
Hic audivit Paulum loquentem qui intuitus eum et videns quia haberet fidem ut salvus fieret.
10 Dixit magna voce : Surge super pedes tuos rectus. Et exsilivit, et ambulabat.
Dixit magna voce surge super pedes tuos rectus et exilivit et ambulabat.
11 Turbæ autem cum vidissent quod fecerat Paulus, levaverunt vocem suam, lycaonice dicentes : Dii similes facti hominibus descenderunt ad nos.
Turbae autem cum vidissent quod fecerat Paulus levaverunt vocem suam lycaonice dicentes dii similes facti hominibus descenderunt ad nos.
12 Et vocabant Barnabam Jovem, Paulum vero Mercurium, quoniam ipse erat dux verbi.
Et vocabant Barnaban Iovem Paulum vero Mercurium quoniam ipse erat dux verbi.
13 Sacerdos quoque Jovis, qui erat ante civitatem, tauros et coronas ante januas afferens, cum populis volebat sacrificare.
Sacerdos quoque Iovis qui erat ante civitatem tauros et coronas ante ianuas adferens cum populis volebat sacrificare.
14 Quod ubi audierunt apostoli Barnabas et Paulus, conscissis tunicis suis, exsilierunt in turbas, clamantes,
Quod ubi audierunt apostoli Barnabas et Paulus conscissis tunicis suis exilierunt in turbas clamantes.
15 Et dicentes : Viri, quid hæc facitis ? Et nos mortales sumus, similes vobis homines, annuntiantes vobis ab his vanis converti ad Deum vivum, qui fecit cælum, et terram, et mare, et omnia quæ in eis sunt ;
Et dicentes viri quid haec facitis et nos mortales sumus similes vobis homines adnuntiantes vobis ab his vanis converti ad Deum vivum qui fecit caelum et terram et mare et omnia quae in eis sunt.
16 Qui in præteritis generationibus dimisit omnes gentes ingredi in vias suas.
Qui in praeteritis generationibus dimisit omnes gentes ingredi in vias suas.
17 Et quidem non sine testimonio semetipsum reliquit benefaciens de cœlo, dans pluvias et tempora fructifera, implens cibo et lætitia corda nostra.
Et quidem non sine testimonio semet ipsum reliquit benefaciens de caelo dans pluvias et tempora fructifera implens cibo et laetitia corda vestra.
18 Et hæc dicentes, vix sedaverunt turbas ne sibi immolarent.
Et haec dicentes vix sedaverunt turbas ne sibi immolarent.
19 Supervenerunt autem quidam ab Antiochia et Iconio Judæi ; et persuasis turbis, lapidantesque Paulum, traxerunt extra civitatem, existimantes eum mortuum esse.
Supervenerunt autem quidam ab Antiochia et Iconio Iudaei et persuasis turbis lapidantesque Paulum traxerunt extra civitatem aestimantes eum mortuum esse.
20 Circumdantibus autem eum discipulis, surgens intravit civitatem, et postera die profectus est cum Barnaba in Derben.
Circumdantibus autem eum discipulis surgens intravit civitatem et postera die profectus est cum Barnaba in Derben.
21 Cumque evangelizassent civitati illi, et docuissent multos, reversi sunt Lystram, et Iconium, et Antiochiam,
Cumque evangelizassent civitati illi et docuissent multos reversi sunt Lystram et Iconium et Antiochiam.
22 Confirmantes animas discipulorum, exhortantesque ut permanerent in fide, et quoniam per multas tribulationes oportet nos intrare in regnum Dei.
Confirmantes animas discipulorum exhortantes ut permanerent in fide et quoniam per multas tribulationes oportet nos intrare in regnum Dei.
23 Et cum constituissent illis per singulas Ecclesias presbyteros, et orassent cum jejunationibus, commendaverunt eos Domine, in quem crediderunt.
Et cum constituissent illis per singulas ecclesias presbyteros et orassent cum ieiunationibus commendaverunt eos Domino in quem crediderunt.
24 Transeuntesque Pisidiam, venerunt Pamphyliam.
Transeuntesque Pisidiam venerunt Pamphiliam.
25 Et loquentes verbum Domini in Perge, descenderunt in Attaliam ;
Et loquentes in Pergen verbum Domini descenderunt in Attaliam.
26 Et inde navigaverunt Antiochiam, unde erant traditi gratiæ Dei in opus quod compleverunt.
Et inde navigaverunt Antiochiam unde erant traditi gratiae Dei in opus quod conpleverunt.
27 Cum autem venissent, et congregassent Ecclesiam, retulerunt quanta fecisset Deus cum illis, etquia aperuisset gentibus ostium fidei.
Cum autem venissent et congregassent ecclesiam rettulerunt quanta fecisset Deus cum illis quia aperuisset gentibus ostium fidei.
28 Morati sunt autem tempus non modicum cum discipulis.
Morati sunt autem tempus non modicum cum discipulis.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org — Nova Vulgata Bibliorum Sacrorum Editio.
