12 Ideoque et nos tantam habentes impositam nubem testium, deponentes omne pondus, et circumstans nos peccatum, per patientiam curramus ad propositum nobis certamen ;
Ideoque et nos tantam habentes inpositam nubem testium deponentes omne pondus et circumstans nos peccatum per patientiam curramus propositum nobis certamen.
2 Aspicientes in auctorem fidei et consummatorem, Jesum, qui proposito sibi gaudio sustinuit crucem, confusione contempta ; atque in dextera sedis Dei sedet.
Aspicientes in auctorem fidei et consummatorem Iesum qui pro proposito sibi gaudio sustinuit crucem confusione contempta atque in dextera sedis Dei sedit.
3 Recogitate enim eum qui talem sustinuit a peccatoribus adversum semetipsum contradictionem, ut ne fatigemini, animis vestris deficientes.
Recogitate enim eum qui talem sustinuit a peccatoribus adversum semet ipsos contradictionem ut ne fatigemini animis vestris deficientes.
4 Nondum enim usque ad sanguinem restitistis, adversus peccatum repugnantes.
Nondum usque ad sanguinem restitistis adversus peccatum repugnantes.
5 Et obliti estis consolationis, quæ vobis tanquam filiis loquitur, dicens : Fili mi, noli negligere disciplinam Domini, neque fatigeris dum ab eo argueris ?
Et obliti estis consolationis quae vobis tamquam filiis loquitur dicens fili mi noli neglegere disciplinam Domini neque fatigeris dum ab eo argueris.
6 Quem enim diligit Dominus castigat, flagellat autem omnem filium quem recipit.
Quem enim diligit Dominus castigat flagellat autem omnem filium quem recipit.
7 In disciplina perseverate. Tanquam filiis vobis offert se Deus ; quis enim filius quem non corripit pater ?
In disciplina perseverate tamquam filiis vobis offert Deus quis enim filius quem non corripit pater.
8 Quod si extra disciplinam estis, cujus participes facti sunt omnes, ergo adulteri, et non filii estis.
Quod si extra disciplinam estis cuius participes facti sunt omnes ergo adulteri et non filii estis.
9 Deinde patres quidem carnis nostræ, eruditores habuimus, et reverebamur eos ; non multo magis obtemperabimus Patri spirituum, et vivemus ?
Deinde patres quidem carnis nostrae habuimus eruditores et reverebamur non multo magis obtemperabimus Patri spirituum et vivemus.
10 Et illi quidem in tempore paucorum dierum, secundum voluntatem suam erudiebant nos ; hic autem ad id, quod utile est in recipiendo sanctificationem ejus.
Et illi quidem in tempore paucorum dierum secundum voluntatem suam erudiebant nos hic autem ad id quod utile est in recipiendo sanctificationem eius.
11 Omnis autem disciplina in præsenti quidem videtur non esse gaudii, sed mœroris ; postea autem fructum pacatissimum exercitatis per eam reddet justitiæ.
Omnis autem disciplina in praesenti quidem videtur non esse gaudii sed maeroris postea autem fructum pacatissimum exercitatis per eam reddit iustitiae.
12 Propter quod, remissas manus, et soluta genua erigite,
Propter quod remissas manus et soluta genua erigite.
13 Et gressus rectos facite pedibus vestris, ut non claudicans quis erret, magis autem sanetur.
Et gressus rectos facite pedibus vestris ut non claudicans erret magis autem sanetur.
14 Pacem sequimini cum omnibus, et sanctimoniam, sine qua nemo videbit Deum,
Pacem sequimini cum omnibus et sanctimoniam sine qua nemo videbit Dominum.
15 Contemplantes nequis desit gratiæ Dei, ne qua radix amaritudinis sursum germinans impediat, et per illam inquinentur multi ;
Contemplantes ne quis desit gratiae Dei ne qua radix amaritudinis sursum germinans inpediat et per illam inquinentur multi.
16 Ne quis fornicator, aut profanus ut Esau, qui propter unam escam vendidit primitiva sua.
Ne quis fornicator aut profanus ut Esau qui propter unam escam vendidit primitiva sua.
17 Scitote enim quoniam et postea cupiens hereditare benedictionem, reprobatus est, non enim invenit pœnitentiæ locum, quanquam cum lacrimis inquisisset eam.
Scitote enim quoniam et postea cupiens hereditare benedictionem reprobatus est non enim invenit paenitentiae locum quamquam cum lacrimis inquisisset eam.
18 Non enim accessistis ad tractabilem montem, et accensibilem ignem, et turbinem, et caliginem, et procellam ;
Non enim accessistis ad tractabilem et accensibilem ignem et turbinem et caliginem et procellam.
19 Et tubæ sonum, et vocem verborum, quam qui audierunt, excusaverunt se, ne eis fieret verbum.
Et tubae sonum et vocem verborum quam qui audierunt excusaverunt se ne eis fieret verbum.
20 Non enim portabant quod dicebatur : Et si bestia tetigerit montem, lapidabitur.
Non enim portabant quod dicebatur et si bestia tetigerit montem lapidabitur.
21 Et ita terribile erat quod videbatur. Moyses dixit : Exterritus sum, et tremebundus.
Et ita terribile erat quod videbatur Moses dixit exterritus sum et tremebundus.
22 Sed accessistis ad Sion montem, et civitatem Dei viventis, Jerusalem cælestem, et multorum millium angelorum frequentiam,
Sed accessistis ad Sion montem et civitatem Dei viventis Hierusalem caelestem et multorum milium angelorum frequentiae.
23 Et Ecclesiam primitivorum, qui conscripti sunt in cælis, et judicem omnium, Deum, et spiritus justorum perfectorum,
Et ecclesiam primitivorum qui conscripti sunt in caelis et iudicem omnium Deum et spiritus iustorum perfectorum.
24 Et testamenti novi mediatorem, Jesum, et sanguinis aspersionem melius loquentem quam Abel.
Et testamenti novi mediatorem Iesum et sanguinis sparsionem melius loquentem quam Abel.
25 Videte ne recusetis loquentem ; si enim illi non effugerunt, recusantes eum qui super terram loquebatur, multo magis nos, qui de cælis loquentem nobis avertimus.
Videte ne recusetis loquentem si enim illi non effugerunt recusantes eum qui super terram loquebatur multo magis nos qui de caelis loquentem nobis avertimur.
26 Cujus vox movit terram tunc, nunc autem repromittit, dicens : Adhuc semel, et ego movebo non solum terram, sed et cælum.
Cuius vox movit terram tunc modo autem repromittit dicens adhuc semel ego movebo non solum terram sed et caelum.
27 Quod autem, Adhuc semel, dicit, declarat mobilium translationem, tanquam factorum, ut maneant ea quæ sunt immobilia.
Quod autem adhuc semel dicit declarat mobilium translationem tamquam factorum ut maneant ea quae sunt inmobilia.
28 Itaque regnum immobile suscipientes, habemus gratiam per quam serviamus placentes Deo, cum metu et reverentia.
Itaque regnum inmobile suscipientes habemus gratiam per quam serviamus placentes Deo cum metu et reverentia.
29 Etenim Deus noster ignis consumens est.
Etenim Deus noster ignis consumens est.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org — Nova Vulgata Bibliorum Sacrorum Editio.
