5 Post hæc erat dies festus Judæorum, et ascendit Jesus Jerosolymam.
Post haec erat dies festus Iudaeorum et ascendit Iesus Hierosolymis.
2 Est autem Jerosolymis Probatica piscina, quæ cognominatur hebraice Bethsaida, quinque porticus habens.
Est autem Hierosolymis super Probatica piscina quae cognominatur hebraice Bethsaida quinque porticus habens.
3 In his jacebat multitudo magna languentium, cæcorum, claudorum, aridorum, exspectantium aquæ motum.
In his iacebat multitudo magna languentium caecorum claudorum aridorum expectantium aquae motum.
4 Angelus autem Domini descendebat secundum tempus in piscinam, et movebatur aqua. Et qui prior descendisset in piscinam post motionem aquæ, sanus fiebat a quacumque detinebatur infirmitate.
[Angelus autem Domini descendebat secundum tempus in piscinam: et movebatur aqua. Et qui prior descendisset in piscinam post motionem aquae sanus fiebat a quacumque detinebatur infirmitate.]
5 Erat autem quidam homo ibi, triginta et octo annos habens in infirmitate sua.
Erat autem quidam homo ibi triginta et octo annos habens in infirmitate sua.
6 Hunc autem cum vidisset Jesus jacentem, et cognovisset quia jam multum tempus haberet, dicit ei : Vis sanus fieri ?
Hunc cum vidisset Iesus iacentem et cognovisset quia multum iam tempus habet dicit ei vis sanus fieri.
7 Respondit ei languidus : Domine, hominem non habeo, ut cum turbata fuerit aqua, mittat me in piscinam ; dum venio enim ego, alius ante me descendit.
Respondit ei languidus Domine hominem non habeo ut cum turbata fuerit aqua mittat me in piscinam dum venio enim ego alius ante me descendit.
8 Dicit ei Jesus : Surge, tolle grabatum tuum, et ambula.
Dicit ei Iesus surge tolle grabattum tuum et ambula.
9 Et statim sanus factus est homo ille, et sustulit grabatum suum, et ambulabat. Erat autem sabbatum in die illo.
Et statim sanus factus est homo et sustulit grabattum suum et ambulabat erat autem sabbatum in illo die.
10 Dicebant ergo Judæi illi qui sanatus fuerat : Sabbatum est, non licet tibi tollere grabatum tuum.
Dicebant Iudaei illi qui sanatus fuerat sabbatum est non licet tibi tollere grabattum tuum.
11 Respondit eis : Qui me sanum fecit, ille mihi dixit : Tolle grabatum tuum, et ambula.
Respondit eis qui me fecit sanum ille mihi dixit tolle grabattum tuum et ambula.
12 Interrogaverunt ergo eum : Quis est ille homo, qui dixit tibi : Tolle grabatum tuum, et ambula ?
Interrogaverunt ergo eum quis est ille homo qui dixit tibi tolle grabattum tuum et ambula.
13 Is autem qui sanus fuerat effectus, nesciebat quis esset. Jesus enim declinavit a turba constituta in loco.
Is autem qui sanus fuerat effectus nesciebat quis esset Iesus enim declinavit turba constituta in loco.
14 Postea invenit eum Jesus in templo, et dixit illi : Ecce sanus factus es ; jam noli peccare, ne deterius tibi aliquid contingat.
Postea invenit eum Iesus in templo et dixit illi ecce sanus factus es iam noli peccare ne deterius tibi aliquid contingat.
15 Abiit ille homo, et nuntiavit Judæis quia Jesus esset, qui fecit eum sanum.
Abiit ille homo et nuntiavit Iudaeis quia Iesus esset qui fecit eum sanum.
16 Propterea persequebantur Judæi Jesum, quia hæc faciebat in sabbato.
Propterea persequebantur Iudaei Iesum quia haec faciebat in sabbato.
17 Jesus autem respondit eis : Pater meus usque modo operatur, et ego operor.
Iesus autem respondit eis Pater meus usque modo operatur et ego operor.
18 Propterea ergo magis quærebant eum Judæi interficere ; quia non solum solvebat sabbatum, sed et patrem suum dicebat Deum, æqualem se faciens Deo.
Propterea ergo magis quaerebant eum Iudaei interficere quia non solum solvebat sabbatum sed et Patrem suum dicebat Deum aequalem se faciens Deo respondit itaque Iesus et dixit eis.
19 Respondit itaque Jesus, et dixit eis : Amen, amen dico vobis, non potest Filius a se facere quidquam, nisi quod viderit Patrem facientem ; quæcumque enim ille fecerit, hæc et Filius similiter facit.
Amen amen dico vobis non potest Filius a se facere quicquam nisi quod viderit Patrem facientem quaecumque enim ille fecerit haec et Filius similiter facit.
20 Pater enim diligit Filium, et omnia demonstrat ei, quæ ipse facit : et majora his demonstrabit ei opera, ut vos miremini.
Pater enim diligit Filium et omnia demonstrat ei quae ipse facit et maiora his demonstrabit ei opera ut vos miremini.
21 Sicut enim Pater suscitat mortuos et vivificat, sic et Filius quos vult, vivificat.
Sicut enim Pater suscitat mortuos et vivificat sic et Filius quos vult vivificat.
22 Neque enim Pater judicat quemquam ; sed omne judicium dedit Filio.
Neque enim Pater iudicat quemquam sed iudicium omne dedit Filio.
23 Ut omnes honorificent Filium, sicut honorificant Patrem. Qui non honorificat Filium, non honorificat Patrem, qui misit illum.
Ut omnes honorificent Filium sicut honorificant Patrem qui non honorificat Filium non honorificat Patrem qui misit illum.
24 Amen, amen dico vobis, quia qui verbum meum audit, et credit ei qui misit me, habet vitam æternam, et in judicium non venit, sed transiit a morte in vitam.
Amen amen dico vobis quia qui verbum meum audit et credit ei qui misit me habet vitam aeternam et in iudicium non venit sed transit a morte in vitam.
25 Amen, amen dico vobis, quia venit hora, et nunc est, quando mortui audient vocem Filii Dei, et qui audierint, vivent.
Amen amen dico vobis quia venit hora et nunc est quando mortui audient vocem Filii Dei et qui audierint vivent.
26 Sicut enim Pater habet vitam in semetipso, sic dedit et Filio habere vitam in semetipso ;
Sicut enim Pater habet vitam in semet ipso sic dedit et Filio vitam habere in semet ipso.
27 Et potestatem dedit ei judicium facere, quia Filius hominis est.
Et potestatem dedit ei et iudicium facere quia Filius hominis est.
28 Nolite mirari hoc, quia venit hora, in qua omnes, qui in monumentis sunt, audient vocem Filii Dei ;
Nolite mirari hoc quia venit hora in qua omnes qui in monumentis sunt audient vocem eius.
29 Et procedent qui bona fecerunt, in resurrectionem vitæ ; qui vero mala egerunt, in resurrectionem judicii.
Et procedent qui bona fecerunt in resurrectionem vitae qui vero mala egerunt in resurrectionem iudicii.
30 Non possum ego a meipso facere quidquam. Sicut audio, judico ; et judicium meum justum est, quia non quæro voluntatem meam, sed voluntatem ejus qui misit me.
Non possum ego a me ipso facere quicquam sicut audio iudico et iudicium meum iustum est quia non quaero voluntatem meam sed voluntatem eius qui misit me.
31 Si ego testimonium perhibeo de meipso, testimonium meum non est verum.
Si ego testimonium perhibeo de me testimonium meum non est verum.
32 Alius est, qui testimonium perhibet de me, et scio quia verum est testimonium quod perhibet de me.
Alius est qui testimonium perhibet de me et scio quia verum est testimonium quod perhibet de me.
33 Vos misistis ad Joannem, et testimonium perhibuit veritati.
Vos misistis ad Iohannem et testimonium perhibuit veritati.
34 Ego autem non ab homine testimonium accipio ; sed hæc dico ut vos salvi sitis.
Ego autem non ab homine testimonium accipio sed haec dico ut vos salvi sitis.
35 Ille erat lucerna ardens et lucens. Vos autem voluistis ad horam exsultare in luce ejus.
Ille erat lucerna ardens et lucens vos autem voluistis exultare ad horam in luce eius.
36 Ego autem habeo testimonium majus Joanne. Opera enim, quæ dedit mihi Pater ut perficiam ea, ipsa opera, quæ ego facio, testimonium perhibent de me, quia Pater misit me ;
Ego autem habeo testimonium maius Iohanne opera enim quae dedit mihi Pater ut perficiam ea ipsa opera quae ego facio testimonium perhibent de me quia Pater me misit.
37 Et qui misit me Pater, ipse testimonium perhibuit de me ; neque vocem ejus umquam audistis, neque speciem ejus vidistis.
Et qui misit me Pater ipse testimonium perhibuit de me neque vocem eius umquam audistis neque speciem eius vidistis.
38 Et verbum ejus non habetis in vobis manens, quia quem misit ille, huic vos non creditis.
Et verbum eius non habetis in vobis manens quia quem misit ille huic vos non creditis.
39 Scrutamini Scripturas, quia vos putatis in ipsis vitam æternam habere ; et illæ sunt, quæ testimonium perhibent de me ;
Scrutamini scripturas quia vos putatis in ipsis vitam aeternam habere et illae sunt quae testimonium perhibent de me.
40 Et non vultis venire ad me ut vitam habeatis.
Et non vultis venire ad me ut vitam habeatis.
41 Claritatem ab hominibus non accipio.
Claritatem ab hominibus non accipio.
42 Sed cognovi vos, quia dilectionem Dei non habetis in vobis.
Sed cognovi vos quia dilectionem Dei non habetis in vobis.
43 Ego veni in nomine Patris mei, et non accipitis me : si alius venerit in nomine suo, illum accipietis.
Ego veni in nomine Patris mei et non accipitis me si alius venerit in nomine suo illum accipietis.
44 Quomodo vos potestis credere, qui gloriam ab invicem accipitis, et gloriam, quæ a solo Deo est, non quæritis ?
Quomodo potestis vos credere qui gloriam ab invicem accipitis et gloriam quae a solo est Deo non quaeritis.
45 Nolite putare quia ego accusaturus sim vos apud Patrem ; est qui accusat vos Moyses, in quo vos speratis.
Nolite putare quia ego accusaturus sim vos apud Patrem est qui accuset vos Moses in quo vos speratis.
46 Si enim crederetis Moysi, crederetis forsitan et mihi ; de me enim ille scripsit.
Si enim crederetis Mosi crederetis forsitan et mihi de me enim ille scripsit.
47 Si autem illius litteris non creditis, quomodo verbis meis credetis ?
Si autem illius litteris non creditis quomodo meis verbis credetis.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org — Nova Vulgata Bibliorum Sacrorum Editio.
