11 Et factum est, cum consummasset Jesus, præcipiens duodecim discipulis suis, transiit inde ut doceret, et prædicaret in civitatibus eorum.
Et factum est cum consummasset Iesus praecipiens duodecim discipulis suis transiit inde ut doceret et in civitatibus eorum.
2 Joannes autem cum audisset in vinculis opera Christi, mittens duos de discipulis suis,
Iohannes autem cum audisset in vinculis opera Christi mittens duos de discipulis suis.
3 Ait illi : Tu es, qui venturus es, an alium exspectamus ?
Ait illi tu es qui venturus es an alium expectamus.
4 Et respondens Jesus ait illis : Euntes renuntiate Joanni quæ audistis, et vidistis.
Et respondens Iesus ait illis euntes renuntiate Iohanni quae auditis et videtis.
5 Cæci vident, claudi ambulant, leprosi mundantur, surdi audiunt, mortui resurgunt, pauperes evangelizantur ;
Caeci vident claudi ambulant leprosi mundantur surdi audiunt mortui resurgunt pauperes evangelizantur.
6 Et beatus est, qui non fuerit scandalizatus in me.
Et beatus est qui non fuerit scandalizatus in me.
7 Illis autem abeuntibus, cœpit Jesus dicere ad turbas de Joanne : Quid existis in desertum videre ? arundinem vento agitatam ?
Illis autem abeuntibus coepit Iesus dicere ad turbas de Iohanne quid existis in desertum videre harundinem vento agitatam.
8 Sed quid existis videre ? Hominem mollibus vestitum ? Ecce qui mollibus vestiuntur, in domibus regum sunt.
Sed quid existis videre hominem mollibus vestitum ecce qui mollibus vestiuntur in domibus regum sunt.
9 Sed quid existis videre ? Prophetam ? Etiam dico vobis, et plus quam prophetam.
Sed quid existis videre prophetam etiam dico vobis et plus quam prophetam.
10 Hic est enim de quo scriptum est : Ecce ego mitto angelum meum ante faciem tuam, qui præparabit viam tuam ante te.
Hic enim est de quo scriptum est ecce ego mitto angelum meum ante faciem tuam qui praeparabit viam tuam ante te.
11 Amen dico vobis, non surrexit inter natos mulierum major Joanne Baptista ; qui autem minor est in regno cælorum, major est illo.
Amen dico vobis non surrexit inter natos mulierum maior Iohanne Baptista qui autem minor est in regno caelorum maior est illo.
12 A diebus autem Joannis Baptistæ usque nunc, regnum cælorum vim patitur, et violenti rapiunt illud.
A diebus autem Iohannis Baptistae usque nunc regnum caelorum vim patitur et violenti rapiunt illud.
13 Omnes enim prophetæ et lex, usque ad Joannem prophetaverunt ;
Omnes enim prophetae et lex usque ad Iohannem prophetaverunt.
14 Et si vultis recipere, ipse est Elias, qui venturus est.
Et si vultis recipere ipse est Helias qui venturus est.
15 Qui habet aures audiendi, audiat.
Qui habet aures audiendi audiat.
16 Cui autem similem æstimabo generationem istam ? Similis est pueris sedentibus in foro ; qui clamantes coæqualibus
Cui autem similem aestimabo generationem istam similis est pueris sedentibus in foro qui clamantes.
17 Dicunt : Cecinimus vobis, et non saltastis ; lamentavimus, et non planxistis.
Dicunt cecinimus vobis et non saltastis lamentavimus et non planxistis.
18 Venit enim Joannes neque manducans, neque bibens, et dicunt : Dæmonium habet.
Venit enim Iohannes neque manducans neque bibens et dicunt daemonium habet.
19 Venit Filius hominis manducans, et bibens, et dicunt : Ecce homo vorax, et potator vini, publicanorum, et peccatorum amicus. Et justificata est sapientia a filiis suis.
Venit Filius hominis manducans et bibens et dicunt ecce homo vorax et potator vini publicanorum et peccatorum amicus et iustificata est sapientia a filiis suis.
20 Tunc cœpit exprobrare civitatibus, in quibus factæ sunt plurimæ virtutes ejus, quia non egissent pœnitentiam.
Tunc coepit exprobrare civitatibus in quibus factae sunt plurimae virtutes eius quia non egissent paenitentiam.
21 Væ tibi Corozain, væ tibi Bethsaida : quia, si in Tyro, et Sidone factæ essent virtutes, quæ factæ sunt in vobis, olim in cilicio, et cinere pœnitentiam egissent.
Vae tibi Corazain vae tibi Bethsaida quia si in Tyro et Sidone factae essent virtutes quae factae sunt in vobis olim in cilicio et cinere paenitentiam egissent.
22 Verumtamen dico vobis : Tyro, et Sidoni remissius erit in die judicii, quam vobis.
Verumtamen dico vobis Tyro et Sidoni remissius erit in die iudicii quam vobis.
23 Et tu Capharnaum, numquid usque in cælum exaltaberis ? usque in infernum descendes ; quia, si in Sodomis factæ fuissent virtutes, quæ factæ sunt in te, forte mansissent usque in hanc diem.
Et tu Capharnaum numquid usque in caelum exaltaberis usque in infernum descendes quia si in Sodomis factae fuissent virtutes quae factae sunt in te forte mansissent usque in hunc diem.
24 Verumtamen dico vobis, quia terræ Sodomorum remissius erit in die judicii, quam tibi.
Verumtamen dico vobis quia terrae Sodomorum remissius erit in die iudicii quam tibi.
25 In illo tempore respondens Jesus dixit : Confiteor tibi, Pater, Domine cæli et terræ, quia abscondisti hæc a sapientibus, et prudentibus, et revelasti ea parvulis.
In illo tempore respondens Iesus dixit confiteor tibi Pater Domine caeli et terrae quia abscondisti haec a sapientibus et prudentibus et revelasti ea parvulis.
26 Ita Pater ; quoniam sic fuit placitum ante te.
Ita Pater quoniam sic fuit placitum ante te.
27 Omnia mihi tradita sunt a Patre meo. Et nemo novit Filium, nisi Pater ; neque Patrem quis novit, nisi Filius, et cui voluerit Filius revelare.
Omnia mihi tradita sunt a Patre meo et nemo novit Filium nisi Pater neque Patrem quis novit nisi Filius et cui voluerit Filius revelare.
28 Venite ad me omnes, qui laboratis, et onerati estis, et ego reficiam vos.
Venite ad me omnes qui laboratis et onerati estis et ego reficiam vos.
29 Tollite jugum meum super vos, et discite a me, quia mitis sum, et humilis corde ; et invenietis requiem animabus vestris.
Tollite iugum meum super vos et discite a me quia mitis sum et humilis corde et invenietis requiem animabus vestris.
30 Jugum enim meum suave est, et onus meum leve.
Iugum enim meum suave est et onus meum leve est.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org — Nova Vulgata Bibliorum Sacrorum Editio.
