9 Non sum liber ? Non sum apostolus ? Nonne Christum Jesum, Dominum nostrum, vidi ? Nonne opus meum vos estis in Domino ?
Non sum liber non sum apostolus nonne Iesum Dominum nostrum vidi non opus meum vos estis in Domino.
2 Et si aliis non sum apostolus, sed tamen vobis sum ; nam signaculum apostolatus mei vos estis in Domino.
Si aliis non sum apostolus sed tamen vobis sum nam signaculum apostolatus mei vos estis in Domino.
3 Mea defensio apud eos qui me interrogant, hæc est ;
Mea defensio apud eos qui me interrogant haec est.
4 Numquid non habemus potestatem manducandi, et bibendi ?
Numquid non habemus potestatem manducandi et bibendi.
5 Numquid non habemus potestatem mulierem sororem circumducendi, sicut et ceteri apostoli, et fratres Domini, et Cephas ?
Numquid non habemus potestatem sororem mulierem circumducendi sicut et ceteri apostoli et fratres Domini et Cephas.
6 Aut ego solus, et Barnabas, non habemus potestatem hoc operandi ?
Aut solus ego et Barnabas non habemus potestatem hoc operandi.
7 Quis militat suis stipendiis umquam ? Quis plantat vineam, etde fructu ejus non edit ? Quis pascit gregem, et de lacte gregis non manducat ?
Quis militat suis stipendiis umquam quis plantat vineam et fructum eius non edit quis pascit gregem et de lacte gregis non manducat.
8 Numquid secundum hominem hæc dico ? An et lex hæc non dicit ?
Numquid secundum hominem haec dico an et lex haec non dicit.
9 Scriptum est enim in lege Moysi : Non alligabis os bovi trituranti. Numquid de bobus cura est Deo ?
Scriptum est enim in lege Mosi non alligabis os bovi trituranti numquid de bubus cura est Deo.
10 An propter nos utique hoc dicit ? Nam propter nos scripta sunt ; quoniam debet in spe, qui arat, arare ; et qui triturat, in spe fructus percipiendi.
An propter nos utique dicit nam propter nos scripta sunt quoniam debet in spe qui arat arare et qui triturat in spe fructus percipiendi.
11 Si nos vobis spiritualia seminavimus, magnum est si nos carnalia vestra metamus ?
Si nos vobis spiritalia seminavimus magnum est si nos carnalia vestra metamus.
12 Si alii potestatis vestræ participes sunt, quare non potius nos ? sed non usi sumus hac potestate ; sed omnia sustinemus, ne quod offendiculum demus Evangelio Christi.
Si alii potestatis vestrae participes sunt non potius nos sed non usi sumus hac potestate sed omnia sustinemus ne quod offendiculum demus evangelio Christi.
13 Nescitis quoniam qui in sacrario operantur, quæ de sacrario sunt, edunt ; et qui altario deserviunt, cum altari participant ?
Nescitis quoniam qui in sacrario operantur quae de sacrario sunt edunt qui altario deserviunt cum altario participantur.
14 Ita et Dominus ordinavit iis qui Evangelium annuntiant, de Evangelio vivere.
Ita et Dominus ordinavit his qui evangelium adnuntiant de evangelio vivere.
15 Ego autem nullo horum usus sum. Non autem scripsi hæc ut ita fiant in me, bonum est enim mihi magis mori quam ut gloriam meam quis evacuet.
Ego autem nullo horum usus sum non scripsi autem haec ut ita fiant in me bonum est enim mihi magis mori quam ut gloriam meam quis evacuet.
16 Nam si evangelizavero, non est mihi gloria, necessitas enim mihi incumbit ; væ enim mihi est si non evangelizavero.
Nam si evangelizavero non est mihi gloria necessitas enim mihi incumbit vae enim mihi est si non evangelizavero.
17 Si enim volens hoc ago, mercedem habeo ; si autem invitus, dispensatio mihi credita est.
Si enim volens hoc ago mercedem habeo si autem invitus dispensatio mihi credita est.
18 Quæ est ergo merces mea ? Ut Evangelium prædicans, sine sumptu ponam Evangelium, ut non abutar potestate mea in Evangelio.
Quae est ergo merces mea ut evangelium praedicans sine sumptu ponam evangelium ut non abutar potestate mea in evangelio.
19 Nam cum liber essem ex omnibus, omnium me servum feci, ut plures lucrifacerem.
Nam cum liber essem ex omnibus omnium me servum feci ut plures lucri facerem.
20 Et factus sum Judæis tanquam Judæus, ut Judæos lucrarer ;
Et factus sum Iudaeis tamquam Iudaeus ut Iudaeos lucrarer.
21 Iis qui sub lege sunt, quasi sub lege essem (cum ipse non essem sub lege), ut eos qui sub lege erant lucrifacerem ; iis qui sine lege erant, tanquam sine lege essem (cum sine lege Dei non essem, sed in lege essem Christi), ut lucrifacerem eos qui sine lege erant.
His qui sub lege sunt quasi sub lege essem cum ipse non essem sub lege ut eos qui sub lege erant lucri facerem his qui sine lege erant tamquam sine lege essem cum sine lege Dei non essem sed in lege essem Christi ut lucri facerem eos qui sine lege erant.
22 Factus sum infirmis infirmus, ut infirmos lucrifacerem ; omnibus omnia factus sum, ut omnes facerem salvos.
Factus sum infirmis infirmus ut infirmos lucri facerem omnibus omnia factus sum ut omnes facerem salvos.
23 Omnia autem facio propter Evangelium, ut particeps ejus efficiar.
Omnia autem facio propter evangelium ut particeps eius efficiar.
24 Nescitis quod ii qui in stadio currunt, omnes quidem currunt ; sed unus accipit bravium ? Sic currite ut comprehendatis.
Nescitis quod hii qui in stadio currunt omnes quidem currunt sed unus accipit bravium sic currite ut conprehendatis.
25 Omnis autem, qui in agone contendit, ab omnibus se abstinet ; et illi quidem ut corruptibilem coronam accipiant, nos autem incorruptam.
Omnis autem qui in agone contendit ab omnibus se abstinet et illi quidem ut corruptibilem coronam accipiant nos autem incorruptam.
26 Ego igitur sic curro, non quasi in incertum. Sic pugno, non quasi ærem verberans ;
Ego igitur sic curro non quasi in incertum sic pugno non quasi aerem verberans.
27 Sed castigo corpus meum, et in servitutem redigo, ne forte, cum aliis prædicaverim, ipse reprobus efficiar.
Sed castigo corpus meum et in servitutem redigo ne forte cum aliis praedicaverim ipse reprobus efficiar.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org — Nova Vulgata Bibliorum Sacrorum Editio.
