16 Et audivi vocem magnam de templo, dicentem septem angelis : Ite, et effundite septem phialas iræ Dei in terram.
Et audivi vocem magnam de templo dicentem septem angelis ite et effundite septem fialas irae Dei in terram.
2 Et abiit primus, et effudit phialam suam in terram, et factum est vulnus sævum, et pessimum in homines, qui habebant caracterem bestiæ, et in eos, qui adoraverunt imaginem ejus.
Et abiit primus et effudit fialam suam in terram et factum est vulnus saevum ac pessimum in homines qui habent caracterem bestiae et eos qui adoraverunt imaginem eius.
3 Et secundus angelus effudit phialam suam in mare, et factus est sanguis tanquam mortui ; et omnis anima vivens mortua est in mari.
Et secundus effudit fialam suam in mare et factus est sanguis tamquam mortui et omnis anima vivens mortua est in mari.
4 Et tertius effudit phialam suam super flumina, et super fontes aquarum ; et factus est sanguis.
Et tertius effudit fialam suam super flumina et super fontes aquarum et factus est sanguis.
5 Et audivi angelum aquarum, dicentem : Justus es, Domine, qui es, et qui eras ; sanctus, qui hæc judicasti :
Et audivi angelum aquarum dicentem iustus es qui es et qui eras sanctus quia haec iudicasti.
6 Quia sanguinem sanctorum et prophetarum effuderunt, et sanguinem eis dedisti bibere ; digni enim sunt.
Quia sanguinem sanctorum et prophetarum fuderunt et sanguinem eis dedisti bibere digni sunt.
7 Et audivi alterum ab altari, dicentem : Etiam, Domine, Deus omnipotens, vera et justa judicia tua.
Et audivi altare dicens etiam Domine Deus omnipotens vera et iusta iudicia tua.
8 Et quartus angelus effudit phialam suam in solem, et datum est illi æstu affligere homines et igni ;
Et quartus effudit fialam suam in solem et datum est illi aestu adficere homines et igni.
9 Et æstuaverunt homines æstu magno, et blasphemaverunt nomen Dei habentis potestatem super has plagas, neque egerunt pœnitentiam ut darent illi gloriam.
Et aestuaverunt homines aestu magno et blasphemaverunt nomen Dei habentis potestatem super has plagas neque egerunt paenitentiam ut darent illi gloriam.
10 Et quintus angelus effudit phialam suam super sedem bestiæ ; et factum est regnum ejus tenebrosum, et commanducaverunt linguas suas præ dolore ;
Et quintus effudit fialam suam super sedem bestiae et factum est regnum eius tenebrosum et conmanducaverunt linguas suas prae dolore.
11 Et blasphemaverunt Deum cæli, præ doloribus, et vulneribus suis ; et non egerunt pœnitentiam ex operibus suis.
Et blasphemaverunt Deum caeli prae doloribus et vulneribus suis et non egerunt paenitentiam ex operibus suis.
12 Et sextus angelus effudit phialam suam in flumen illud magnum, Euphraten ; et siccavit aquam ejus, ut præpararetur via regibus ab ortu solis.
Et sextus effudit fialam suam in flumen illud magnum Eufraten et siccavit aquam eius ut praepararetur via regibus ab ortu solis.
13 Et vidi de ore draconis, et de ore bestiæ, et de ore pseudoprophetæ, spiritus tres immundos in modum ranarum.
Et vidi de ore draconis et de ore bestiae et de ore pseudoprophetae spiritus tres inmundos in modum ranarum.
14 Sunt enim spiritus dæmoniorum facientes signa, et procedunt ad reges totius terræ congregare illos in prælium ad diem magnum omnipotentis Dei.
Sunt enim spiritus daemoniorum facientes signa et procedunt ad reges totius terrae congregare illos in proelium ad diem magnum Dei omnipotentis.
15 Ecce venio sicut fur. Beatus qui vigilat, et custodit vestimenta sua, ne nudus ambulet, et videant turpitudinem ejus.
Ecce venio sicut fur beatus qui vigilat et custodit vestimenta sua ne nudus ambulet et videant turpitudinem eius.
16 Et congregabit illos in locum qui vocatur hebraice Armagedon.
Et congregavit illos in locum qui vocatur hebraice Hermagedon.
17 Et septimus angelus effudit phialam suam in aerem, et exivit vox magna de templo a throno, dicens : Factum est.
Et septimus effudit fialam suam in aerem et exivit vox magna de templo a throno dicens factum est.
18 Et facta sunt fulgura, et voces, et tonitrua, et terræ motus factus est magnus, qualis numquam fuit ex quo homines fuerunt super terram, talis terræ motus, sic magnus.
Et facta sunt fulgora et voces et tonitrua et terraemotus factus est magnus qualis numquam fuit ex quo homines fuerunt super terram talis terraemotus sic magnus.
19 Et facta est civitas magna in tres partes, et civitates gentium ceciderunt, et Babylon magna venit in memoriam ante Deum, dare illi calicem vini indignationis iræ ejus.
Et facta est civitas magna in tres partes et civitates gentium ceciderunt et Babylon magna venit in memoriam ante Deum dare ei calicem vini indignationis irae eius.
20 Et omnis insula fugit, et montes non sunt inventi.
Et omnis insula fugit et montes non sunt inventi.
21 Et grando magna sicut talentum descendit de cælo in homines ; et blasphemaverunt Deum homines propter plagam grandinis quoniam magna facta est vehementer.
Et grando magna sicut talentum descendit de caelo in homines et blasphemaverunt homines Deum propter plagam grandinis quoniam magna facta est vehementer.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org — Nova Vulgata Bibliorum Sacrorum Editio.
