9 Saulus autem adhuc inspirans minarum et cædis in discipulos Domini, accessit ad principem sacerdotum,
Saulus autem adhuc inspirans minarum et caedis in discipulos Domini accessit ad principem sacerdotum.
2 Et petiit ab eo epistolas in Damascum ad synagogas, ut si quos invenisset hujus viæ viros ac mulieres, vinctos perduceret in Jerusalem.
Et petiit ab eo epistulas in Damascum ad synagogas ut si quos invenisset huius viae viros ac mulieres vinctos perduceret in Hierusalem.
3 Et cum iter faceret, contigit ut appropinquaret Damasco, et subito circumfulsit eum lux de cælo ;
Et cum iter faceret contigit ut adpropinquaret Damasco et subito circumfulsit eum lux de caelo.
4 Et cadens in terram audivit vocem dicentem sibi : Saule, Saule, quid me persequeris ?
Et cadens in terram audivit vocem dicentem sibi Saule Saule quid me persequeris.
5 Qui dixit : Quis es, Domine ? Et ille : Ego sum Jesus quem tu persequeris ; durum est tibi contra stimulum calcitrare.
Qui dixit quis es Domine et ille ego sum Iesus quem tu persequeris. [Durum est tibi contra stimulum calcitrare.]
6 Et tremens ac stupens, dixit : Domine, quid me vis facere ?
[Et tremens ac stupens dixit Domine quid me vis facere.]
7 Et Dominus ad eum : Surge, et ingredere civitatem, et ibi dicetur tibi quid te oporteat facere. Viri autem illi qui comitabantur cum eo, stabant stupefacti, audientes quidem vocem, nominem autem videntes.
[Et Dominus ad eum] sed surge et ingredere civitatem et dicetur tibi quid te oporteat facere viri autem illi qui comitabantur cum eo stabant stupefacti audientes quidem vocem neminem autem videntes.
8 Surrexit autem Saulus de terra ; apertisque oculis, nihil videbat. Ad manus autem illum trahentes, introduxerunt Damascum,
Surrexit autem Saulus de terra apertisque oculis nihil videbat ad manus autem illum trahentes introduxerunt Damascum.
9 Et erat tribus diebus non videns, et non manducavit neque bibit.
Et erat tribus diebus non videns et non manducavit neque bibit.
10 Erat autem quidam discipulus Damasci, nomine Ananias, et dixit ad illum in visu Dominus : Anania. At ille ait : Ecce ego, Domine.
Erat autem quidam discipulus Damasci nomine Ananias et dixit ad illum in visu Dominus Anania at ille ait ecce ego Domine.
11 Et Dominus ad eum : Surge, et vade in vicum qui vocatur Rectus, et quære in domo Judæ Saulum nomine, Tarsensem ; ecce enim orat.
Et Dominus ad illum surgens vade in vicum qui vocatur Rectus et quaere in domo Iudae Saulum nomine Tarsensem ecce enim orat.
12 (Et vidit virum Ananiam nomine introeuntem, et imponentem sibi manus ut visum recipiat.)
Et vidit virum Ananiam nomine introeuntem et inponentem sibi manus ut visum recipiat.
13 Respondit autem Ananias : Domine, audivi a multis de viro hoc, quanta mala fecerit sanctis tuis in Jerusalem ;
Respondit autem Ananias Domine audivi a multis de viro hoc quanta mala sanctis tuis fecerit in Hierusalem.
14 Et hic habet potestatem a principibus sacerdotum alligandi omnes qui invocant nomen tuum.
Et hic habet potestatem a principibus sacerdotum alligandi omnes qui invocant nomen tuum.
15 Dixit autem ad eum Dominus : Vade, quoniam vas electionis est mihi iste, ut portet nomen meum coram gentibus, et regibus, et filiis Israel ;
Dixit autem ad eum Dominus vade quoniam vas electionis est mihi iste ut portet nomen meum coram gentibus et regibus et filiis Israhel.
16 Ego enim ostendam illi quanta oporteat eum pro nomine meo pati.
Ego enim ostendam illi quanta oporteat eum pro nomine meo pati.
17 Et abiit Ananias ; et introivit in domum, et imponens ei manus, dixit : Saule frater, Dominus misit me Jesus, qui apparuit tibi in via qua veniebas, ut videas, et implearis Spiritu sancto.
Et abiit Ananias et introivit in domum et inponens ei manus dixit Saule frater Dominus misit me Iesus qui apparuit tibi in via qua veniebas ut videas et implearis Spiritu Sancto.
18 Et confestim ceciderunt ab oculis ejus tanquam squamæ, et visum recepit ; et surgens baptizatus est.
Et confestim ceciderunt ab oculis eius tamquam squamae et visum recepit et surgens baptizatus est.
19 Et cum accepisset cibum, confortatus est. Fuit autem cum discipulis qui erant Damasci per dies aliquot.
Et cum accepisset cibum confortatus est fuit autem cum discipulis qui erant Damasci per dies aliquot.
20 Et continuo in synagogis prædicabat Jesum, quoniam hic est Filius Dei.
Et continuo in synagogis praedicabat Iesum quoniam hic est Filius Dei.
21 Stupebant autem omnes qui audiebant, et dicebant : Nonne hic est qui expugnabat in Jerusalem eos, qui invocabant nomen istud, et huc ad hoc venit, ut vinctos illos duceret ad principes sacerdotum ?
Stupebant autem omnes qui audiebant et dicebant nonne hic est qui expugnabat in Hierusalem eos qui invocabant nomen istud et huc ad hoc venit ut vinctos illos duceret ad principes sacerdotum.
22 Saulus autem multo magis convalescebat, et confundebat Judæos qui habitabant Damasci, affirmans quoniam hic est Christus.
Saulus autem magis convalescebat et confundebat Iudaeos qui habitabant Damasci adfirmans quoniam hic est Christus.
23 Cum autem implerentur dies multi, consilium fecerunt in unum Judæi, ut eum interficerent.
Cum implerentur autem dies multi consilium fecerunt Iudaei ut eum interficerent.
24 Notæ autem factæ sunt Saulo insidiæ eorum ; custodiebant autem et portas die ac nocte, ut eum interficerent ;
Notae autem factae sunt Saulo insidiae eorum custodiebant autem et portas die ac nocte ut eum interficerent.
25 Accipientes autem eum discipuli nocte, per murum dimiserunt eum, submittentes in sporta.
Accipientes autem discipuli eius nocte per murum dimiserunt eum submittentes in sporta.
26 Cum autem venisset in Jerusalem, tentabat se jungere discipulis ; et omnes timebant eum, non credentes quod esset discipulus.
Cum autem venisset in Hierusalem temptabat iungere se discipulis et omnes timebant eum non credentes quia esset discipulus.
27 Barnabas autem apprehensum illum duxit ad apostolos, et narravit illis quomodo in via vidisset Dominum, et quia locutus est ei, et quomodo in Damasco fiducialiter egerit in nomine Jesu.
Barnabas autem adprehensum illum duxit ad apostolos et narravit illis quomodo in via vidisset Dominum et quia locutus est ei et quomodo in Damasco fiducialiter egerit in nomine Iesu.
28 Et erat cum illis intrans et exiens in Jerusalem, et fiducialiter agens in nomine Domini.
Et erat cum illis intrans et exiens in Hierusalem et fiducialiter agens in nomine Domini.
29 Loquebatur quoque gentibus, et disputabat cum Græcis ; illi autem quærebant occidere eum.
Loquebatur quoque et disputabat cum Graecis illi autem quaerebant occidere eum.
30 Quod cum cognovissent fratres, deduxerunt eum Cæsaream, et dimiserunt Tarsum.
Quod cum cognovissent fratres deduxerunt eum Caesaream et dimiserunt Tarsum.
31 Ecclesia quidem per totam Judæam, et Galilæam, et Samariam, habebat pacem ; et ædificabatur, ambulans in timore Domini, et consolatione sancti Spiritus replebatur.
Ecclesia quidem per totam Iudaeam et Galilaeam et Samariam habebat pacem et aedificabatur ambulans in timore Domini et consolatione Sancti Spiritus replebatur.
32 Factum est autem ut Petrum, dum pertransiret universos, deveniret ad sanctos qui habitabant Lyddæ.
Factum est autem Petrum dum pertransiret universos devenire et ad sanctos qui habitabant Lyddae.
33 Invenit autem ibi hominem quendam, nomine Æneam, ab annis octo jacentem in grabatto, qui erat paralyticus.
Invenit autem ibi hominem quendam nomine Aeneam ab annis octo iacentem in grabatto qui erat paralyticus.
34 Et ait illi Petrus : Ænea, sanat te Dominus Jesus Christus ; surge, et sterne tibi. Et continuo surrexit.
Et ait illi Petrus Aeneas sanat te Iesus Christus surge et sterne tibi et continuo surrexit.
35 Et viderunt eum omnes qui habitabant Lyddæ et Saronæ, qui conversi sunt ad Dominum.
Et viderunt illum omnes qui habitabant Lyddae et Saronae qui conversi sunt ad Dominum.
36 In Joppe autem fuit quædam discipula, nomine Tabitha, quæ interpretata dicitur Dorcas. Hæc erat plena operibus bonis, et eleemosynis quas faciebat.
In Ioppe autem fuit quaedam discipula nomine Tabitas quae interpretata dicitur Dorcas haec erat plena operibus bonis et elemosynis quas faciebat.
37 Factum est autem in diebus illis ut infirmata moreretur ; quam cum lavissent, posuerunt eam in cœnaculo.
Factum est autem in diebus illis ut infirmata moreretur quam cum lavissent posuerunt eam in cenaculo.
38 Cum autem prope esset Lydda ab Joppen, discipuli audientes quia Petrus esset in ea, miserunt duos viros ad eum, rogantes : Ne pigriteris venire usque ad nos.
Cum autem prope esset Lydda ab Ioppe discipuli audientes quia Petrus esset in ea miserunt duos viros ad eum rogantes ne pigriteris venire usque ad nos.
39 Exsurgens autem Petrus, venit cum illis. Et cum advenisset, duxerunt illum in cœnaculum ; et circumsteterunt illum omnes viduæ flentes, et ostendentes ei tunicas et vestes quas faciebat illis Dorcas.
Exsurgens autem Petrus venit cum illis et cum advenisset duxerunt illum in cenaculum et circumsteterunt illum omnes viduae flentes et ostendentes tunicas et vestes quas faciebat illis Dorcas.
40 Ejectis autem omnibus foras, Petrus ponens genua, oravit ; et conversus ad corpus, dixit : Tabitha surge. At illa aperuit oculos suos ; et viso Petro, resedit.
Eiectis autem omnibus foras Petrus ponens genua oravit et conversus ad corpus dixit Tabita surge at illa aperuit oculos suos et viso Petro resedit.
41 Dans autem illi manum, erexit eam ; et, cum vocasset sanctos et viduas, assignavit eam vivam.
Dans autem illi manum erexit eam et cum vocasset sanctos et viduas adsignavit eam vivam.
42 Notum autem factum est per universam Joppen ; et crediderunt multi in Domino.
Notum autem factum est per universam Ioppen et crediderunt multi in Domino.
43 Factum est autem ut dies multos moraretur in Joppe, apud Simonem quendam coriarium.
Factum est autem ut dies multos moraretur in Ioppe apud quendam Simonem coriarium.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org — Nova Vulgata Bibliorum Sacrorum Editio.
