11 Audierunt autem apostoli, et fratres qui erant in Judæa, quoniam et gentes receperunt verbum Dei.
Audierunt autem apostoli et fratres qui erant in Iudaea quoniam et gentes receperunt verbum Dei.
2 Cum autem ascendisset Petrus Jerosolymam, disceptabant adversus illum, qui erant ex circumcisione.
Cum ascendisset autem Petrus in Hierosolymam disceptabant adversus illum qui erant ex circumcisione.
3 Dicentes : Quare introisti ad viros præputium habentes, et manducasti cum illis ?
Dicentes quare introisti ad viros praeputium habentes et manducasti cum illis.
4 Incipiens autem Petrus exponebat illis ordinem, dicens :
Incipiens autem Petrus exponebat illis ordinem dicens.
5 Ego eram in civitate Joppe, orans, et vidi in excessu mentis visionem, descendens vas quoddam, velut linteum magnum quatuor initiis summitti de cælo, et venit usque ad me ;
Ego eram in civitate Ioppe orans et vidi in excessu mentis visionem descendens vas quoddam velut linteum magnum quattuor initiis submitti de caelo et venit usque ad me.
6 In quod intuens, considerabam, et vidi quadrupedia terræ, et bestias, et reptilia, et volatilia cæli.
In quod intuens considerabam et vidi quadrupedia terrae et bestias et reptilia et volatilia caeli.
7 Audivi autem et vocem dicentem mihi : Surge, Petre ; occide et manduca.
Audivi autem et vocem dicentem mihi surgens Petre occide et manduca.
8 Dixi autem : Nequaquam, Domine, quia commune aut immundum numquam introivit in os meum.
Dixi autem nequaquam Domine quia commune aut inmundum numquam introivit in os meum.
9 Respondit autem vox secundo de cælo : Quæ Deus mundavit, tu ne commune dixeris.
Respondit autem vox secundo de caelo quae Deus mundavit tu ne commune dixeris.
10 Hoc autem factum est per ter ; et recepta sunt omnia rursum in cælum.
Hoc autem factum est per ter et recepta sunt rursum omnia in caelum.
11 Et ecce viri tres confestim adstiterunt in domo in qua eram, missi a Cæsarea ad me.
Et ecce confestim tres viri adstiterunt in domo in qua eram missi a Caesarea ad me.
12 Dixit autem Spiritus mihi, ut irem cum illis, nihil hæsitans. Venerunt autem mecum et sex fratres isti, et ingressi sumus in domum viri.
Dixit autem Spiritus mihi ut irem cum illis nihil haesitans venerunt autem mecum et sex fratres isti et ingressi sumus in domum viri.
13 Narravit autem nobis quomodo vidisset angelum in domo sua stantem, et dicentem sibi : Mitte in Joppen, et accersi Simonem, qui cognominatur Petrus.
Narravit autem nobis quomodo vidisset angelum in domo sua stantem et dicentem sibi mitte in Ioppen et accersi Simonem qui cognominatur Petrus.
14 Qui loquetur tibi verba in quibus salvus eris tu, et universa domus tua.
Qui loquetur tibi verba in quibus salvus eris tu et universa domus tua.
15 Cum autem cœpissem loqui, decidit Spiritus sanctus super eos, sicut et in nos in initio.
Cum autem coepissem loqui decidit Spiritus Sanctus super eos sicut et in nos in initio.
16 Recordatus sum autem verbi Domini, sicut dicebat : Joannes quidem baptizavit aqua, vos autem baptizabimini Spiritu sancto.
Recordatus sum autem verbi Domini sicut dicebat Iohannes quidem baptizavit aqua vos autem baptizabimini Spiritu Sancto.
17 Si ergo eamdem gratiam dedit illis Deus, sicut et nobis qui credidimus in Dominum Jesum Christum, ego quis eram, qui possem prohibere Deum ?
Si ergo eandem gratiam dedit illis Deus sicut et nobis qui credidimus in Dominum Iesum Christum ego quis eram qui possem prohibere Deum.
18 His auditis, tacuerunt, et glorificaverunt Deum, dicentes : Ergo et gentibus pœnitentiam dedit Deus ad vitam.
His auditis tacuerunt et glorificaverunt Deum dicentes ergo et gentibus Deus paenitentiam ad vitam dedit.
19 Et illi quidem qui dispersi fuerant a tribulatione quæ facta fuerat sub Stephano, perambulaverunt usque Phœnicen, et Cyprum, et Antiochiam, nemini loquentes verbum, nisi solis Judæis.
Et illi quidem qui dispersi fuerant a tribulatione quae facta fuerat sub Stephano perambulaverunt usque Foenicen et Cyprum et Antiochiam nemini loquentes verbum nisi solis Iudaeis.
20 Erant autem quidam ex eis viri Cyprii et Cyrenæi, qui, cum introissent Antiochiam, loquebantur et ad Græcos, annuntiantes Dominum Jesum.
Erant autem quidam ex eis viri cyprii et cyrenei qui cum introissent Antiochiam loquebantur et ad Graecos adnuntiantes Dominum Iesum.
21 Et erat manus Domini cum eis ; multusque numerus credentium conversus est ad Dominum.
Et erat manus Domini cum eis multusque numerus credentium conversus est ad Dominum.
22 Pervenit autem sermo ad aures Ecclesiæ quæ erat Jerosolymis, super istis, et miserunt Barnabam usque ad Antiochiam.
Pervenit autem sermo ad aures ecclesiae quae erat Hierosolymis super istis et miserunt Barnaban usque Antiochiam.
23 Qui cum pervenisset, et vidisset gratiam Dei, gavisus est, et hortabatur omnes proposito cordis permanere in Domino ;
Qui cum pervenisset et vidisset gratiam Dei gavisus est et hortabatur omnes proposito cordis permanere in Domino.
24 Quia erat vir bonus, et plenus Spiritu sancto, et fide. Et apposita est multa turba Domino.
Quia erat vir bonus et plenus Spiritu Sancto et fide et adposita est turba multa Domino.
25 Profectus est autem Barnabas Tarsum, ut quæreret Saulum ; quem cum invenisset, perduxit Antiochiam.
Profectus est autem Tarsum ut quaereret Saulum quem cum invenisset perduxit Antiochiam.
26 Et annum totum conversati sunt ibi in Ecclesia, et docuerunt turbam multam ; ita ut cognominarentur primum Antiochiæ discipuli, Christiani.
Et annum totum conversati sunt in ecclesia et docuerunt turbam multam ita ut cognominarentur primum Antiochiae discipuli Christiani.
27 In his autem diebus supervenerunt ab Jerosolymis prophetæ Antiochiam ;
In his autem diebus supervenerunt ab Hierosolymis prophetae Antiochiam.
28 Et surgens unus ex eis, nomine Agabus, significabat per Spiritum famem magnam futuram in universo orbe terrarum, quæ facta est sub Claudio.
Et surgens unus ex eis nomine Agabus significabat per Spiritum famem magnam futuram in universo orbe terrarum quae facta est sub Claudio.
29 Discipuli autem, prout quis habebat, proposuerunt singuli eorum in ministerium mittere habitantibus in Judæa fratribus.
Discipuli autem prout quis habebat proposuerunt singuli eorum in ministerium mittere habitantibus in Iudaea fratribus.
30 Quod et fecerunt, mittentes ad seniores, per manus Barnabæ et Sauli.
Quod et fecerunt mittentes ad seniores per manus Barnabae et Sauli.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org — Nova Vulgata Bibliorum Sacrorum Editio.
