12 Eodem autem tempore, misit Herodes rex manus ut affligeret quosdam de Ecclesia.
Eodem autem tempore misit Herodes rex manus ut adfligeret quosdam de ecclesia.
2 Occidit autem Jacobum, fratrem Joannis, gladio ;
Occidit autem Iacobum fratrem Iohannis gladio.
3 Videns autem quia placeret Judæis, apposuit apprehendere et Petrum. Erant autem dies Azymorum.
Videns autem quia placeret Iudaeis adposuit adprehendere et Petrum erant autem dies azymorum.
4 Quem cum apprehendisset, misit in carcerem, tradens quatuor quaternionibus militum custodiendum, volens post Pascha producere eum populo.
Quem cum adprehendisset misit in carcerem tradens quattuor quaternionibus militum custodire eum volens post pascha producere eum populo.
5 Et Petrus quidem servabatur in carcere, oratio autem fiebat sine intermissione ab Ecclesia ad Deum pro eo.
Et Petrus quidem servabatur in carcere oratio autem fiebat sine intermissione ab ecclesia ad Deum pro eo.
6 Cum autem producturus eum esset Herodes, in ipsa nocte erat Petrus dormiens inter duos milites, vinctus catenis duabus, et custodes ante ostium custodiebant carcerem ;
Cum autem producturus eum esset Herodes in ipsa nocte erat Petrus dormiens inter duos milites vinctus catenis duabus et custodes ante ostium custodiebant carcerem.
7 Et ecce angelus Domini asstitit, et lumen refulsit in habitaculo : percussoque latere Petri, excitavit eum, dicens : Surge velociter. Et ceciderunt catenæ de manibus ejus.
Et ecce angelus Domini adstitit et lumen refulsit in habitaculo percussoque latere Petri suscitavit eum dicens surge velociter et ceciderunt catenae de manibus eius.
8 Dixit autem angelus ad eum : Præcingere et calcia te caligas tuas. Et fecit sic ; et dixit illi : Circumda tibi vestimentum tuum, et sequere me.
Dixit autem angelus ad eum praecingere et calcia te gallicas tuas et fecit sic et dixit illi circumda tibi vestimentum tuum et sequere me.
9 Et exiens sequebatur eum, et nesciebat quia verum est quod fiebat per angelum, existimabat autem se visum videre.
Et exiens sequebatur et nesciebat quia verum est quod fiebat per angelum aestimabat autem se visum videre.
10 Transeuntes autem primam et secundam custodiam, venerunt ad portam ferream, quæ ducit ad civitatem, quæ ultro aperta est eis, et exeuntes processerunt vicum unum ; et continuo discessit angelus ab eo.
Transeuntes autem primam et secundam custodiam venerunt ad portam ferream quae ducit ad civitatem quae ultro aperta est eis et exeuntes processerunt vicum unum et continuo discessit angelus ab eo.
11 Et Petrus ad se reversus, dixit : Nunc scio vere quia misit Dominus angelum suum, et eripuit me de manu Herodis, et de omni exspectatione plebis Judæorum.
Et Petrus ad se reversus dixit nunc scio vere quia misit Dominus angelum suum et eripuit me de manu Herodis et de omni expectatione plebis Iudaeorum.
12 Consideransque, venit ad domum Mariæ, matris Joannis, qui cognominatus est Marcus, ubi erant multi congregati, et orantes.
Consideransque venit ad domum Mariae matris Iohannis qui cognominatus est Marcus ubi erant multi congregati et orantes.
13 Pulsante autem eo ostium januæ, processit puella ad audiendum, nomine Rhode.
Pulsante autem eo ostium ianuae processit puella ad audiendum nomine Rhode.
14 Et ut cognovit vocem Petri, præ gaudio non aperuit januam, sed intro currens, nuntiavit stare Petrum ante januam.
Et ut cognovit vocem Petri prae gaudio non aperuit ianuam sed intro currens nuntiavit stare Petrum ante ianuam.
15 At illi dixerunt ad eam : Insanis. Illa autem affirmabat sic se habere. Illi autem dicebant : Angelus ejus est.
At illi dixerunt ad eam insanis illa autem adfirmabat sic se habere illi autem dicebant angelus eius est.
16 Petrus autem perseverabat pulsans. Cum autem aperuissent, viderunt eum, et obstupuerunt.
Petrus autem perseverabat pulsans cum autem aperuissent viderunt eum et obstipuerunt.
17 Annuens autem eis manu, ut tacerent, narravit quomodo Dominus eduxisset eum de carcere, dixitque : Nuntiate Jacobo et fratribus hæc. Et egressus, abiit in alium locum,
Annuens autem eis manu ut tacerent enarravit quomodo Dominus eduxisset eum de carcere dixitque nuntiate Iacobo et fratribus haec et egressus abiit in alium locum.
18 Facta autem die, erat non parva turbatio inter milites, quidnam factum esset de Petro.
Facta autem die erat non parva turbatio inter milites quidnam de Petro factum esset.
19 Herodes autem cum requisisset eum, et non invenisset, inquisitione facta de custodibus, iussit eos duci ; descendensque a Judæa in Cæsaream, ibi commoratus est.
Herodes autem cum requisisset eum et non invenisset inquisitione facta de custodibus iussit eos duci descendensque a Iudaea in Caesaream ibi commoratus est.
20 Erat autem iratus Tyriis et Sidoniis. At illi unianimes venerunt ad eum ; et persuaso Blasto, qui erat super cubiculum regis, postulabant pacem, eo quod alerentur regiones eorum ab illo.
Erat autem iratus Tyriis et Sidoniis at illi unianimes venerunt ad eum et persuaso Blasto qui erat super cubiculum regis postulabant pacem eo quod alerentur regiones eorum ab illo.
21 Statuto autem die, Herodes vestitus veste regia, sedit pro tribunali, et contionabatur ad eos.
Statuto autem die Herodes vestitus veste regia sedit pro tribunali et contionabatur ad eos.
22 Populus autem adclamabat : Dei voces, et non hominis.
Populus autem adclamabat dei voces et non hominis.
23 Confestim autem percussit eum angelus Domini, eo quod non dedisset honorem Deo ; et consumptus a vermibus exspiravit.
Confestim autem percussit eum angelus Domini eo quod non dedisset honorem Deo et consumptus a vermibus exspiravit.
24 Verbum autem Domini crescebat, et multiplicabatur.
Verbum autem Domini crescebat et multiplicabatur.
25 Barnabas autem et Saulus reversi sunt ab Jerosolymis, expleto ministerio, assumpto Joanne, qui cognominatus est Marcus.
Barnabas autem et Saulus reversi sunt ab Hierosolymis expleto ministerio adsumpto Iohanne qui cognominatus est Marcus.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org — Nova Vulgata Bibliorum Sacrorum Editio.
