24 Post quinque autem dies, descendit princeps sacerdotum Ananias, cum senioribus quibusdam, et Tertullo quodam oratore, qui adierunt præsidem adversus Paulum.
Post quinque autem dies descendit princeps sacerdotum Ananias cum senioribus quibusdam et Tertullo quodam oratore qui adierunt praesidem adversus Paulum.
2 Et, citato Paulo, cœpit accusare Tertullus, dicens : Cum in multa pace agamus per te, et multa corrigantur per tuam providentiam,
Et citato Paulo coepit accusare Tertullus dicens cum in multa pace agamus per te et multa corrigantur per tuam providentiam.
3 Semper et ubique suscipimus, optime Felix, cum omni gratiarum actione.
Semper et ubique suscipimus optime Felix cum omni gratiarum actione.
4 Ne diutius autem te protraham, oro, breviter audias nos pro tua clementia.
Ne diutius autem te protraham oro breviter audias nos pro tua clementia.
5 Invenimus hunc hominem pestiferum, et concitantem seditiones omnibus Judæis in universo orbe, et auctorem seditionis sectæ Nazarenorum ;
Invenimus hunc hominem pestiferum et concitantem seditiones omnibus Iudaeis in universo orbe et auctorem seditionis sectae Nazarenorum.
6 Qui etiam templum violare conatus est, quem et apprehensum voluimus secundum legem nostram judicare.
Qui etiam templum violare conatus est quem et adprehendimus.
7 Superveniens autem tribunus Lysias, cum vi magna eripuit eum de manibus nostris,
[Superveniens autem tribunus Lysias cum vi magna eripuit eum de manibus nostris.]
8 Jubeas accusatores ejus ad te venire ; a quo poteris ipse judicans, de omnibus istis cognoscere, de quibus nos accusamus eum.
A quo poteris ipse iudicans de omnibus istis cognoscere de quibus nos accusamus eum.
9 Adjecerunt autem et Judæi, dicentes hæc ita se habere.
Adiecerunt autem et Iudaei dicentes haec ita se habere.
10 Respondit autem Paulus (annuente sibi præside dicere) : Ex multis annis te esse judicem genti huic sciens, bono animo pro me satisfaciam.
Respondit autem Paulus annuente sibi praeside dicere ex multis annis esse te iudicem genti huic sciens bono animo pro me satisfaciam.
11 Potes enim cognoscere quia non plus sunt mihi dies quam duodecim, ex quo ascendi adorare in Jerusalem ;
Potes enim cognoscere quia non plus sunt dies mihi quam duodecim ex quo ascendi adorare in Hierusalem.
12 Et neque in templo invenerunt me cum aliquo disputantem, aut concursum facientem turbæ, neque in synagogis.
Et neque in templo invenerunt me cum aliquo disputantem aut concursum facientem turbae neque in synagogis neque in civitate.
13 Neque in civitate ; neque probare possunt tibi de quibus nunc me accusant.
Neque probare possunt tibi de quibus nunc accusant me.
14 Confiteor autem hoc tibi, quod secundum sectam quam dicunt hæresim, sic deservio Patri et Deo meo, credens omnibus quæ in lege et prophetis scripta sunt ;
Confiteor autem hoc tibi quod secundum sectam quam dicunt heresim sic deservio patrio Deo meo credens omnibus quae in lege et prophetis scripta sunt.
15 Spem habens in Deum quam et hi ipsi exspectant, resurrectionem futuram justorum et iniquorum.
Spem habens in Deum quam et hii ipsi expectant resurrectionem futuram iustorum et iniquorum.
16 In hoc et ipse studeo sine offendiculo conscientiam habere ad Deum et ad homines semper.
In hoc et ipse studeo sine offendiculo conscientiam habere ad Deum et ad homines semper.
17 Post annos autem plures, eleemosynas facturus in gentem meam, veni, et oblationes et vota.
Post annos autem plures elemosynas facturus in gentem meam veni et oblationes et vota.
18 In quibus invenerunt me purificatum in templo, non cum turba, neque cum tumultu.
In quibus invenerunt me purificatum in templo non cum turba neque cum tumultu.
19 Quidam autem ex Asia Judæi, quos oportebat apud te præsto esse, et accusare si quid haberent adversum me ;
Quidam autem ex Asia Iudaei quos oportebat apud te praesto esse et accusare si quid haberent adversum me.
20 Aut hi ipsi dicant si quid invenerunt in me iniquitatis, cum stem in concilio ;
Aut hii ipsi dicant si quid invenerunt in me iniquitatis cum stem in concilio.
21 Nisi de una hac solummodo voce, qua clamavi inter eos stans : Quoniam de resurrectione mortuorum ego judicor hodie a vobis.
Nisi de una hac solummodo voce qua clamavi inter eos stans quoniam de resurrectione mortuorum ego iudicor hodie a vobis.
22 Distulit autem illos Felix, certissime sciens de via hac, dicens : Cum tribunus Lysias descenderit, audiam vos.
Distulit autem illos Felix certissime sciens de via dicens cum tribunus Lysias descenderit audiam vos.
23 Jussitque centurioni custodiri eum, et habere requiem, nec quemquam de suis prohibere ministrare ei.
Iussitque centurioni custodiri eum et habere requiem nec quemquam prohibere de suis ministrare ei.
24 Post aliquot autem dies, veniens Felix cum Drusilla, uxore sua, quæ erat Judæa, vocavit Paulum ; et audivit ab eo fidem quæ est in Christum Jesum.
Post aliquot autem dies veniens Felix cum Drusilla uxore sua quae erat Iudaea vocavit Paulum et audivit ab eo fidem quae est in Iesum Christum.
25 Disputante autem illo de Justitia et castitate, et de judicio futuro, tremefactus Felix, respondit : Quod nunc attinet, vade, tempore autem oportuno accersam te.
Disputante autem illo de iustitia et castitate et de iudicio futuro timefactus Felix respondit quod nunc adtinet vade tempore autem oportuno accersiam te.
26 Simul et sperans quod pecunia ei daretur a Paulo, propter quod et frequenter accersens eum, loquebatur cum eo.
Simul et sperans quia pecunia daretur a Paulo propter quod et frequenter accersiens eum loquebatur cum eo.
27 Biennio autem expleto, accepit successorem Felix Portium Festum ; volens autem gratiam præstare Judæis Felix, reliquit Paulum vinctum.
Biennio autem expleto accepit successorem Felix Porcium Festum volens autem gratiam praestare Iudaeis Felix reliquit Paulum vinctum.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org — Nova Vulgata Bibliorum Sacrorum Editio.
