7 Hic enim Melchisedech, rex Salem, sacerdos Dei summi, qui obviavit Abrahæ regresso a cæde regum, et benedixit ei ;
Hic enim Melchisedech rex Salem sacerdos Dei summi qui obviavit Abrahae regresso a caede regum et benedixit ei.
2 Cui et decimas omnium divisit Abraham ; primum quidem qui interpretatur rex justitiæ ; deinde autem et rex Salem, quod est, rex pacis ;
Cui decimas omnium divisit Abraham primum quidem qui interpretatur rex iustitiae deinde autem et rex Salem quod est rex pacis.
3 Sine patre, sine matre, sine genealogia ; neque initium dierum, neque finem vitæ habens assimilatus autem Filio Dei, manet sacerdos in perpetuum.
Sine patre sine matre sine genealogia neque initium dierum neque finem vitae habens adsimilatus autem Filio Dei manet sacerdos in perpetuum.
4 Intuemini autem quantus sit hic, cui et decimas dedit de præcipuis Abraham patriarcha.
Intuemini autem quantus sit hic cui et decimam dedit de praecipuis Abraham patriarcha.
5 Et quidem de filiis Levi sacerdotium accipientes, mandatum habent decimas sumere a populo secundum legem, id est, a fratribus suis, quamquam et ipsi exierint de lumbis Abrahæ.
Et quidem de filiis Levi sacerdotium accipientes mandatum habent decimas sumere a populo secundum legem id est a fratribus suis quamquam et ipsi exierunt de lumbis Abrahae.
6 Cujus autem generatio non annumeratur in eis, decimas sumpsit ab Abraham, et hunc qui habebat repromissiones benedixit.
Cuius autem generatio non adnumeratur in eis decimas sumpsit Abraham et hunc qui habebat repromissiones benedixit.
7 Sine ulla autem contradictione, quod minus est, a meliore benedicitur.
Sine ulla autem contradictione quod minus est a meliore benedicitur.
8 Et hic quidem, decimas morientes homines accipiunt ; ibi autem contestatur, quia vivit.
Et hic quidem decimas morientes homines accipiunt ibi autem contestatus quia vivit.
9 Et (ut ita dictum sit) per Abraham, et Levi, qui decimas accepit, decimatus est,
Et ut ita dictum sit per Abraham et Levi qui decimas accipit decimatus est.
10 Adhuc enim in lumbis patris erat, quando obviavit ei Melchisedech.
Adhuc enim in lumbis patris erat quando obviavit ei Melchisedech.
11 Si ergo consummatio per sacerdotium Leviticum erat (populus enim sub ipso legem accepit), quid adhuc necessarium fuit, secundum ordinem Melchisedech alium surgere sacerdotem, et non secundum ordinem Aaron dici ?
Si ergo consummatio per sacerdotium leviticum erat populus enim sub ipso legem accepit quid adhuc necessarium secundum ordinem Melchisedech alium surgere sacerdotem et non secundum ordinem Aaron dici.
12 Translato enim sacerdotio, necesse est ut et legis translatio fiat.
Translato enim sacerdotio necesse est ut et legis translatio fiat.
13 In quo enim hæc dicuntur, de alia tribu est, de qua nullus altari præsto fuit.
In quo enim haec dicuntur de alia tribu est de qua nullus altario praesto fuit.
14 Manifestum est enim quod ex Juda ortus sit Dominus noster, in qua tribu nihil de sacerdotibus Moyses locutus est.
Manifestum enim quod ex Iuda ortus sit Dominus noster in qua tribu nihil de sacerdotibus Moses locutus est.
15 Et amplius adhuc manifestum est, si secundum similitudinem Melchisedech exsurgat alius sacerdos,
Et amplius adhuc manifestum est si secundum similitudinem Melchisedech exsurgit alius sacerdos.
16 Qui non secundum legem mandati carnalis factus est, sed secundum virtutem vitæ insolubilis ;
Qui non secundum legem mandati carnalis factus est sed secundum virtutem vitae insolubilis.
17 Contestatur enim : Quoniam tu es sacerdos in æternum, secundum ordinem Melchisedech.
Contestatur enim quoniam tu es sacerdos in aeternum secundum ordinem Melchisedech.
18 Reprobatio quidem fit præcedentis mandati, propter infirmitatem ejus, et inutilitatem ;
Reprobatio quidem fit praecedentis mandati propter infirmitatem eius et inutilitatem.
19 Nihil enim ad perfectum adduxit lex ; introductio vero melioris spei, per quam proximamus ad Deum.
Nihil enim ad perfectum adduxit lex introductio vero melioris spei per quam proximamus ad Deum.
20 Et quantum est non sine jurejurando (alii quidem sine jurejurando sacerdotes facti sunt ;
Et quantum est non sine iureiurando alii quidem sine iureiurando sacerdotes facti sunt.
21 Hic autem cum jurejurando, per eum, qui dixit ad illum : Juravit Dominus, et non pœnitebit eum, tu es sacerdos in æternum).
Hic autem cum iureiurando per eum qui dixit ad illum iuravit Dominus et non paenitebit tu es sacerdos in aeternum.
22 In tantum melioris testamenti sponsor factus est Jesus.
In tantum melioris testamenti sponsor factus est Iesus.
23 Et alii quidem plures facti sunt sacerdotes, idcirco quod morte prohiberentur permanere.
Et alii quidem plures facti sunt sacerdotes idcirco quod morte prohiberentur permanere.
24 Hic autem eo quod maneat in æternum sempiternum habet sacerdotium.
Hic autem eo quod maneat in aeternum sempiternum habet sacerdotium.
25 Unde et salvare in perpetuum potest accedentes per semetipsum ad Deum, semper vivens ad interpellandum pro nobis.
Unde et salvare in perpetuo potest accedentes per semet ipsum ad Deum semper vivens ad interpellandum pro eis.
26 Talis enim decebat ut nobis esset pontifex, sanctus, innocens, impollutus, segregatus a peccatoribus, et excelsior cælis factus ;
Talis enim decebat ut nobis esset pontifex sanctus innocens inpollutus segregatus a peccatoribus et excelsior caelis factus.
27 Qui non habet necessitatem quotidie, quemadmodum sacerdotes, prius pro suis delictis hostias offerre, deinde pro populi ; hoc enim fecit semel, seipsum offerendo.
Qui non habet cotidie necessitatem quemadmodum sacerdotes prius pro suis delictis hostias offerre deinde pro populi hoc enim fecit semel se offerendo.
28 Lex enim homines constituit sacerdotes infirmitatem habentes ; sermo autem jurisjurandi, qui post legem est, Filium in æternum perfectum.
Lex enim homines constituit sacerdotes infirmitatem habentes sermo autem iurisiurandi qui post legem est Filium in aeternum perfectum.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org — Nova Vulgata Bibliorum Sacrorum Editio.
