12 Et cœpit illis in parabolis loqui : Vineam pastinavit homo, et circumdedit sepem, et fodit lacum, et ædificavit turrim, et locavit eam agricolis, et peregre profectus est.
Et coepit illis in parabolis loqui vineam pastinavit homo et circumdedit sepem et fodit lacum et aedificavit turrem et locavit eam agricolis et peregre profectus est.
2 Et misit ad agricolas in tempore servum, ut ab agricolis acciperet de fructu vineæ.
Et misit ad agricolas in tempore servum ut ab agricolis acciperet de fructu vineae.
3 Qui apprehensum eum ceciderunt, et dimiserunt vacuum.
Qui adprehensum eum ceciderunt et dimiserunt vacuum.
4 Et iterum misit ad illos alium servum ; et illum in capite vulneraverunt, et contumeliis affecerunt.
Et iterum misit ad illos alium servum et illum capite vulneraverunt et contumeliis adfecerunt.
5 Et rursum alium misit, et illum occiderunt ; et plures alios ; quosdam cædentes, alios vero occidentes.
Et rursum alium misit et illum occiderunt et plures alios quosdam caedentes alios vero occidentes.
6 Adhuc ergo unum habens filium carissimum ; et illum misit ad eos novissimum, dicens : Quia reverebuntur filium meum.
Adhuc ergo unum habens filium carissimum et illum misit ad eos novissimum dicens quia reverebuntur filium meum.
7 Coloni autem dixerunt ad invicem : Hic est hæres ; venite, occidamus eum ; et nostra erit hæreditas.
Coloni autem dixerunt ad invicem hic est heres venite occidamus eum et nostra erit hereditas.
8 Et apprehendentes eum, occiderunt ; et ejecerunt extra vineam.
Et adprehendentes eum occiderunt et eiecerunt extra vineam.
9 Quid ergo faciet dominus vineæ ? Veniet, et perdet colonos ; et dabit vineam aliis.
Quid ergo faciet dominus vineae veniet et perdet colonos et dabit vineam aliis.
10 Nec scripturam hanc legistis : Lapidem, quem reprobaverunt ædificantes, hic factus est in caput anguli ;
Nec scripturam hanc legistis lapidem quem reprobaverunt aedificantes hic factus est in caput anguli.
11 A Domino factum est istud, et est mirabile in oculis nostris ?
A Domino factum est istud et est mirabile in oculis nostris.
12 Et quærebant eum tenere ; et timuerunt turbam ; cognoverunt enim quoniam ad eos parabolam hanc dixerit. Et relicto eo abierunt.
Et quaerebant eum tenere et timuerunt turbam cognoverunt enim quoniam ad eos parabolam hanc dixerit et relicto eo abierunt.
13 Et mittunt ad eum quosdam ex pharisæis, et herodianis, ut eum caperent in verbo.
Et mittunt ad eum quosdam ex Pharisaeis et Herodianis ut eum caperent in verbo.
14 Qui venientes dicunt ei : Magister, scimus quia verax es, et non curas quemquam ; nec enim vides in faciem hominum, sed in veritate viam Dei doces ; licet dari tributum Cæsari, an non dabimus ?
Qui venientes dicunt ei magister scimus quoniam verax es et non curas quemquam nec enim vides in faciem hominis sed in veritate viam Dei doces licet dari tributum Caesari an non dabimus.
15 Qui sciens versutiam illorum, ait illis : Quid me tentatis ? afferte mihi denarium ut videam.
Qui sciens versutiam eorum ait illis quid me temptatis adferte mihi denarium ut videam.
16 At illi attulerunt ei. Et ait illis : Cujus est imago hæc, et inscriptio ? Dicunt ei : Cæsaris.
At illi adtulerunt et ait illis cuius est imago haec et inscriptio dicunt illi Caesaris.
17 Respondens autem Jesus dixit illis : Reddite igitur, quæ sunt Cæsaris, Cæsari ; et quæ sunt Dei, Deo. Et mirabantur super eo.
Respondens autem Iesus dixit illis reddite igitur quae sunt Caesaris Caesari et quae sunt Dei Deo et mirabantur super eo.
18 Et venerunt ad eum sadducæi, qui dicunt resurrectionem non esse ; et interrogabant eum, dicentes :
Et venerunt ad eum Sadducaei qui dicunt resurrectionem non esse et interrogabant eum dicentes.
19 Magister, Moyses nobis scripsit, ut si cujus frater mortuus fuerit, et dimiserit uxorem, et filios non reliquerit, accipiat frater ejus uxorem ipsius, et resuscitet semen fratri suo.
Magister Moses nobis scripsit ut si cuius frater mortuus fuerit et dimiserit uxorem et filios non reliquerit accipiat frater eius uxorem ipsius et resuscitet semen fratri suo.
20 Septem ergo fratres erant ; et primus accepit uxorem, et mortuus est non relicto semine.
Septem ergo fratres erant et primus accepit uxorem et mortuus est non relicto semine.
21 Et secundus accepit eam, et mortuus est ; et nec iste reliquit semen. Et tertius similiter.
Et secundus accepit eam et mortuus est et nec iste reliquit semen et tertius similiter.
22 Et acceperunt eam similiter septem ; et non reliquerunt semen. Novissima omnium defuncta est et mulier.
Et acceperunt eam similiter septem et non reliquerunt semen novissima omnium defuncta est et mulier.
23 In resurrectione ergo cum resurrexerint, cujus de his erit uxor ? septem enim habuerunt eam uxorem.
In resurrectione ergo cum resurrexerint cuius de his erit uxor septem enim habuerunt eam uxorem.
24 Et respondens Jesus, ait illis : Nonne ideo erratis, non scientes Scripturas, neque virtutem Dei ?
Et respondens Iesus ait illis non ideo erratis non scientes scripturas neque virtutem Dei.
25 Cum enim a mortuis resurrexerint, neque nubent, neque nubentur, sed sunt sicut angeli in cælis.
Cum enim a mortuis resurrexerint neque nubent neque nubentur sed sunt sicut angeli in caelis.
26 De mortuis autem quod resurgant, non legistis in libro Moysi, super rubum quomodo dixerit illi Deus, inquiens : Ego sum Deus Abraham, et Deus Isaac, et Deus Jacob ?
De mortuis autem quod resurgant non legistis in libro Mosi super rubum quomodo dixerit illi Deus inquiens ego sum Deus Abraham et Deus Isaac et Deus Iacob.
27 Non est Deus mortuorum, sed vivorum. Vos ergo multum erratis.
Non est Deus mortuorum sed vivorum vos ergo multum erratis.
28 Et accessit unus de scribis, qui audierat illos conquirentes, et videns quoniam bene illis responderit, interrogavit eum quod esset primum omnium mandatum.
Et accessit unus de scribis qui audierat illos conquirentes et videns quoniam bene illis responderit interrogavit eum quod esset primum omnium mandatum.
29 Jesus autem respondit ei : Quia primum omnium mandatum est : Audi Israel, Dominus Deus tuus, Deus unus est ;
Iesus autem respondit ei quia primum omnium mandatum est audi Israhel Dominus Deus noster Deus unus est.
30 Et diliges Dominum Deum tuum ex tota corde tuo, et ex tota anima tua, et ex tota mente tua, et ex tota virtute tua. Hoc est primum mandatum.
Et diliges Dominum Deum tuum ex toto corde tuo et ex tota anima tua et ex tota mente tua et ex tota virtute tua hoc est primum mandatum.
31 Secundum autem simile est illi : Diliges proximum tuum tanquam teipsum. Majus horum aliud mandatum non est.
Secundum autem simile illi diliges proximum tuum tamquam te ipsum maius horum aliud mandatum non est.
32 Et ait illi scriba : Bene Magister, in veritate dixisti, quia unus est Deus, et non est alius præter eum.
Et ait illi scriba bene magister in veritate dixisti quia unus est et non est alius praeter eum.
33 Et ut diligatur ex toto corde, et ex toto intellectu, et ex tota anima, et ex tota fortitudine ; et diligere proximum tanquam seipsum, majus est omnibus holocautomatibus, et sacrificiis.
Et ut diligatur ex toto corde et ex toto intellectu et ex tota anima et ex tota fortitudine et diligere proximum tamquam se ipsum maius est omnibus holocaustomatibus et sacrificiis.
34 Jesus autem videns quod sapienter respondisset, dixit illi : Non es longe a regno Dei. Et nemo jam audebat eum interrogare.
Iesus autem videns quod sapienter respondisset dixit illi non es longe a regno Dei et nemo iam audebat eum interrogare.
35 Et respondens Jesus dicebat, docens in templo : Quomodo dicunt scribæ Christum filium esse David ?
Et respondens Iesus dicebat docens in templo quomodo dicunt scribae Christum Filium esse David.
36 Ipse enim David dicit in Spiritu Sancto : Dixit Dominus Domino meo, sede a dextris meis, donec ponam inimicos tuos scabellum pedum tuorum.
Ipse enim David dicit in Spiritu Sancto dixit Dominus Domino meo sede a dextris meis donec ponam inimicos tuos scabillum pedum tuorum.
37 Ipse ergo David dicit eum Dominum, et unde est filius ejus ? Et multa turba eum libenter audivit.
Ipse ergo David dicit eum Dominum et unde est filius eius et multa turba eum libenter audivit.
38 Et dicebat eis in doctrina sua : Cavete a scribis, qui volunt in stolis ambulare, et salutari in foro,
Et dicebat eis in doctrina sua cavete a scribis qui volunt in stolis ambulare et salutari in foro.
39 Et in primis cathedris sedere in synagogis, et primos discubitus in cœnis ;
Et in primis cathedris sedere in synagogis et primos discubitus in cenis.
40 Qui devorant domos viduarum sub obtentu prolixæ orationis ; hi accipient prolixius judicium.
Qui devorant domos viduarum sub obtentu prolixae orationis hii accipient prolixius iudicium.
41 Et sedens Jesus contra gazophylacium, aspiciebat quomodo turba jactaret æs in gazophylacium, et multi divites jactabant multa.
Et sedens Iesus contra gazofilacium aspiciebat quomodo turba iactaret aes in gazofilacium et multi divites iactabant multa.
42 Cum venisset autem vidua una pauper, misit duo minuta, quod est quadrans,
Cum venisset autem una vidua pauper misit duo minuta quod est quadrans.
43 Et convocans discipulos suos, ait illis : Amen dico vobis, quoniam vidua hæc pauper plus omnibus misit, qui miserunt in gazophylacium.
Et convocans discipulos suos ait illis amen dico vobis quoniam vidua haec pauper plus omnibus misit qui miserunt in gazofilacium.
44 Omnes enim ex eo, quod abundabat illis, miserunt ; hæc vero de penuria sua omnia quæ habuit, misit totum victum suum.
Omnes enim ex eo quod abundabat illis miserunt haec vero de penuria sua omnia quae habuit misit totum victum suum.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org — Nova Vulgata Bibliorum Sacrorum Editio.
