10 Et convocatis duodecim discipulis suis, dedit illis potestatem spirituum immundorum, ut ejicerent eos, et curarent omnem languorem, et omnem infirmitatem.
Et convocatis duodecim discipulis suis dedit illis potestatem spirituum inmundorum ut eicerent eos et curarent omnem languorem et omnem infirmitatem.
2 Duodecim autem apostolorum nomina sunt hæc. Primus: Simon, qui dicitur Petrus, et Andreas frater ejus,
Duodecim autem apostolorum nomina sunt haec primus Simon qui dicitur Petrus et Andreas frater eius.
3 Jacobus Zebedæi, et Joannes frater ejus, Philippus, et Bartholomæus, Thomas, et Matthæus publicanus, Jacobus Alphæi, et Thaddæus,
Iacobus Zebedaei et Iohannes frater eius Philippus et Bartholomeus Thomas et Mattheus publicanus et Iacobus Alphei et Thaddeus.
4 Simon Chananæus, et Judas Iscariotes, qui et tradidit eum.
Simon Cananeus et Iudas Scariotes qui et tradidit eum.
5 Hos duodecim misit Jesus ; præcipiens eis, dicens : In viam gentium ne abieritis, et in civitates Samaritanorum ne intraveritis ;
Hos duodecim misit Iesus praecipiens eis et dicens in viam gentium ne abieritis et in civitates Samaritanorum ne intraveritis.
6 Sed potius ite ad oves, quæ perierunt domus Israel.
Sed potius ite ad oves quae perierunt domus Israhel.
7 Euntes autem prædicate, dicentes : Quia appropinquavit regnum cælorum.
Euntes autem praedicate dicentes quia adpropinquavit regnum caelorum.
8 Infirmos curate, mortuos suscitate, leprosos mundate, dæmones ejicite ; gratis accepistis, gratis date.
Infirmos curate mortuos suscitate leprosos mundate daemones eicite gratis accepistis gratis date.
9 Nolite possidere aurum, neque argentum, neque pecuniam in zonis vestris ;
Nolite possidere aurum neque argentum neque pecuniam in zonis vestris.
10 Non peram in via, neque duas tunicas, neque calceamenta, neque virgam ; dignus enim est operarius cibo suo.
Non peram in via neque duas tunicas neque calciamenta neque virgam dignus enim est operarius cibo suo.
11 In quamcumque autem civitatem, aut castellum intraveritis, interrogate, quis in ea dignus sit ; et ibi manete donec exeatis.
In quamcumque civitatem aut castellum intraveritis interrogate quis in ea dignus sit et ibi manete donec exeatis.
12 Intrantes autem in domum, salutate eam, dicentes : Pax huic domui.
Intrantes autem in domum salutate eam.
13 Et siquidem fuerit domus illa digna, veniet pax vestra super eam ; si autem non fuerit digna, pax vestra revertetur ad vos.
Et siquidem fuerit domus digna veniat pax vestra super eam si autem non fuerit digna pax vestra ad vos revertatur.
14 Et quicumque non receperit vos, neque audierit sermones vestros ; exeunte foras de domo, vel civitate, excutite pulverem de pedibus vestris.
Et quicumque non receperit vos neque audierit sermones vestros exeuntes foras de domo vel de civitate excutite pulverem de pedibus vestris.
15 Amen dico vobis : Tolerabilius erit terræ Sodomorum et Gomorrhæorum in die judicii, quam illi civitati.
Amen dico vobis tolerabilius erit terrae Sodomorum et Gomorraeorum in die iudicii quam illi civitati.
16 Ecce ego mitto vos sicut oves in medio luporum. Estote ergo prudentes sicut serpentes, et simplices sicut columbæ.
Ecce ego mitto vos sicut oves in medio luporum estote ergo prudentes sicut serpentes et simplices sicut columbae.
17 Cavete autem ab hominibus. Tradent enim vos in conciliis, et in synagogis suis flagellabunt vos ;
Cavete autem ab hominibus tradent enim vos in conciliis et in synagogis suis flagellabunt vos.
18 Et ad præsides, et ad reges ducemini propter me in testimonium illis, et gentibus.
Et ad praesides et ad reges ducemini propter me in testimonium illis et gentibus.
19 Cum autem tradent vos, nolite cogitare quomodo, aut quid loquamini ; dabitur enim vobis in illa hora, quid loquamini ;
Cum autem tradent vos nolite cogitare quomodo aut quid loquamini dabitur enim vobis in illa hora quid loquamini.
20 Non enim vos estis qui loquimini, sed Spiritus Patris vestri, qui loquitur in vobis.
Non enim vos estis qui loquimini sed Spiritus Patris vestri qui loquitur in vobis.
21 Tradet autem frater fratrem in mortem, et pater filium ; et insurgent filii in parentes, et morte eos afficient ;
Tradet autem frater fratrem in mortem et pater filium et insurgent filii in parentes et morte eos adficient.
22 Et eritis odio omnibus propter nomen meum ; qui autem perseveraverit usque in finem, hic salvus erit.
Et eritis odio omnibus propter nomen meum qui autem perseveraverit in finem hic salvus erit.
23 Cum autem persequentur vos in civitate ista, fugite in aliam. Amen dico vobis, non consummabitis civitates Israel, donec veniat Filius hominis.
Cum autem persequentur vos in civitate ista fugite in aliam amen enim dico vobis non consummabitis civitates Israhel donec veniat Filius hominis.
24 Non est discipulus super magistrum, nec servus super dominum suum ;
Non est discipulus super magistrum nec servus super dominum suum.
25 Sufficit discipulo, ut sit sicut magister ejus ; et servo, sicut dominus ejus. Si patremfamilias Beelzebub vocaverunt ; quanto magis domesticos ejus ?
Sufficit discipulo ut sit sicut magister eius et servus sicut dominus eius si patrem familias Beelzebub vocaverunt quanto magis domesticos eius.
26 Ne ergo timueritis eos : Nihil enim est opertum, quod non revelabitur ; et occultum, quod non scietur.
Ne ergo timueritis eos nihil enim opertum quod non revelabitur et occultum quod non scietur.
27 Quod dico vobis in tenebris, dicite in lumine ; et quod in aure auditis, prædicate super tecta.
Quod dico vobis in tenebris dicite in lumine et quod in aure auditis praedicate super tecta.
28 Et nolite timere eos, qui occidunt corpus, animam autem non possunt occidere ; sed potius timete eum, qui potest et animam et corpus perdere in gehennam.
Et nolite timere eos qui occidunt corpus animam autem non possunt occidere sed potius eum timete qui potest et animam et corpus perdere in gehennam.
29 Nonne duo passeres asse veneunt ; et unus ex illis non cadet super terram sine patre vestro ?
Nonne duo passeres asse veneunt et unus ex illis non cadet super terram sine Patre vestro.
30 Vestri autem capilli capitis omnes numerati sunt.
Vestri autem et capilli capitis omnes numerati sunt.
31 Nolite ergo timere ; multis passeribus meliores estis vos.
Nolite ergo timere multis passeribus meliores estis vos.
32 Omnis ergo, qui confitebitur me coram hominibus, confitebor et ego eum coram Patre meo, qui in cælis est ;
Omnis ergo qui confitebitur me coram hominibus confitebor et ego eum coram Patre meo qui est in caelis.
33 Qui autem negaverit me coram hominibus, negabo et ego eum coram Patre meo, qui in cælis est.
Qui autem negaverit me coram hominibus negabo et ego eum coram Patre meo qui est in caelis.
34 Nolite arbitrari quia pacem venerim mittere in terram ; non veni pacem mittere, sed gladium ;
Nolite arbitrari quia venerim mittere pacem in terram non veni pacem mittere sed gladium.
35 Veni enim separare hominem adversus patrem suum, et filiam adversus matrem suam, et nurum adversus socrum suam ;
Veni enim separare hominem adversus patrem suum et filiam adversus matrem suam et nurum. adversus socrum suam.
36 Et inimici hominis, domestici ejus.
Et inimici hominis domestici eius.
37 Qui amat patrem aut matrem plus quam me, non est me dignus ; et qui amat filium, aut filiam super me, non est me dignus.
Qui amat patrem aut matrem plus quam me non est me dignus et qui amat filium aut filiam super me non est me dignus.
38 Et qui non accipit crucem suam, et sequitur me, non est me dignus.
Et qui non accipit crucem suam et sequitur me non est me dignus.
39 Qui invenit animam suam, perdet illam ; et qui perdiderit animam suam propter me, inveniet eam.
Qui invenit animam suam perdet illam et qui perdiderit animam suam propter me inveniet eam.
40 Qui recipit vos, me recipit ; et qui me recipit, recipit eum, qui me misit.
Qui recipit vos me recipit et qui me recipit recipit eum qui me misit.
41 Qui recipit prophetam in nomine prophetæ, mercedem prophetæ accipiet ; et qui recipit justum in nomine justi, mercedem justi accipiet.
Qui recipit prophetam in nomine prophetae mercedem prophetae accipiet et qui recipit iustum in nomine iusti mercedem iusti accipiet.
42 Et quicumque potum dederit uni ex minimis istis calicem aquæ frigidæ tantum in nomine discipuli ; amen dico vobis, non perdet mercedem suam.
Et quicumque potum dederit uni ex minimis istis calicem aquae frigidae tantum in nomine discipuli amen dico vobis non perdet mercedem suam.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org — Nova Vulgata Bibliorum Sacrorum Editio.
