11 Dico ergo : Numquid Deus repulit populum suum ? Absit. Nam et ego Israelita sum, ex semine Abraham, de tribu Beniamin.
Dico ergo numquid reppulit Deus populum suum absit nam et ego Israhelita sum ex semine Abraham tribu Beniamin.
2 Non repulit Deus plebem suam, quam præscivit. An nescitis in Elia quid dicit Scriptura, quemadmodum interpellat Deum adversum Israel ?
Non reppulit Deus plebem suam quam praesciit an nescitis in Helia quid dicit scriptura quemadmodum interpellat Deum adversus Israhel.
3 Domine, prophetas tuos occiderunt, altaria tua suffoderunt ; et ego relictus sum solus, et quærunt animam meam.
Domine prophetas tuos occiderunt altaria tua suffoderunt et ego relictus sum solus et quaerunt animam meam.
4 Sed quid dicit illi divinum responsum ? Reliqui mihi septem milia virorum, qui non curvaverunt genua ante Baal.
Sed quid dicit illi responsum divinum reliqui mihi septem milia virorum qui non curvaverunt genu Baal.
5 Sic ergo et in hoc tempore, reliquiæ, secundum electionem gratiæ, factæ actæ sunt.
Sic ergo et in hoc tempore reliquiae secundum electionem gratiae factae sunt.
6 Si autem gratia, jam non ex operibus ; alioquin gratia jam non est gratia.
Si autem gratia non ex operibus alioquin gratia iam non est gratia.
7 Quid ergo ? Quod quærebat Israel, hoc non est consecutus ; electio autem consecuta est, ceteri vero excæcati sunt,
Quid ergo quod quaerebat Israhel hoc non est consecutus electio autem consecuta est ceteri vero excaecati sunt.
8 Sicut scriptum est : Dedit illis Deus spiritum compunctionis, oculos ut non videant, et aures ut non audiant, usque in hodiernum diem.
Sicut scriptum est dedit illis Deus spiritum conpunctionis oculos ut non videant et aures ut non audiant usque in hodiernum diem.
9 Et David dicit : Fiat mensa eorum in laqueum, et in captionem, et in scandalum, et in retributionem illis ;
Et David dicit fiat mensa eorum in laqueum et in captionem et in scandalum et in retributionem illis.
10 Obscurentur oculi eorum ne videant, et dorsum eorum semper incurva.
Obscurentur oculi eorum ne videant et dorsum illorum semper incurva.
11 Dico ergo : Numquid sic offenderunt ut caderent ? Absit ; sed illorum delicto salus gentibus, ut illos æmulentur.
Dico ergo numquid sic offenderunt ut caderent absit sed illorum delicto salus gentibus ut illos aemulentur.
12 Quod si delictum illorum divitiæ sunt mundi, et deminutio ; eorum divitiæ gentium, quanto magis plenitudo eorum !
Quod si delictum illorum divitiae sunt mundi et deminutio eorum divitiae gentium quanto magis plenitudo eorum.
13 Vobis enim dico gentibus : Quamdiu quidem ego sum gentium apostolus, ministerium meum honorificabo,
Vobis enim dico gentibus quamdiu quidem ego sum gentium apostolus ministerium meum honorificabo.
14 Si quomodo ad æmulandum provocem carnem meam, et salvos faciam aliquos ex illis ;
Si quo modo ad aemulandum provocem carnem meam et salvos faciam aliquos ex illis.
15 Si enim amissio eorum reconciliatio est mundi, quæ assumptio, nisi vita ex mortuis ?
Si enim amissio eorum reconciliatio est mundi quae adsumptio nisi vita ex mortuis.
16 Quod si delibatio sancta est, et massa ; et si radix sancta, et rami.
Quod si delibatio sancta est et massa et si radix sancta et rami.
17 Quod si aliqui ex ramis fracti sunt ; tu autem cum oleaster esses, insertus es in illis, et socius radicis et pinguedinis olivæ factus es,
Quod si aliqui ex ramis fracti sunt tu autem cum oleaster esses insertus es in illis et socius radicis et pinguidinis olivae factus es.
18 Noli gloriari adversus ramos. Quod si gloriaris, non tu radicem portas, sed radix te.
Noli gloriari adversus ramos quod si gloriaris non tu radicem portas sed radix te.
19 Dices ergo : Fracti sunt rami ut ego inserar.
Dices ergo fracti sunt rami ut ego inserar.
20 Bene, propter incredulitatem fracti sunt ; tu autem fide stas ; noli altum sapere, sed time.
Bene propter incredulitatem fracti sunt tu autem fide stas noli altum sapere sed time.
21 Si enim Deus naturalibus ramis non pepercit, ne forte nec tibi parcat.
Si enim Deus naturalibus ramis non pepercit ne forte nec tibi parcat.
22 Vide ergo bonitatem, et severitatem Dei ; in eos quidem, qui ceciderunt, severitatem ; in te autem bonitatem Dei, si permanseris in bonitate ; alioquin et tu excideris.
Vide ergo bonitatem et severitatem Dei in eos quidem qui ceciderunt severitatem in te autem bonitatem Dei si permanseris in bonitate alioquin et tu excideris.
23 Sed et illi, si non permanserint in incredulitate, inserentur, potens est enim Deus iterum inserere illos.
Sed et illi si non permanserint in incredulitate inserentur potens est enim Deus iterum inserere illos.
24 Nam si tu ex naturali excisus es oleastro, et contra naturam insertus es in bonam olivam, quanto magis ii qui secundum naturam inserentur suæ olivæ !
Nam si tu ex naturali excisus es oleastro et contra naturam insertus es in bonam olivam quanto magis hii secundum naturam inserentur suae olivae.
25 Nolo enim vos ignorare, fratres, mysterium hoc (ut non sitis vobis ipsis sapientes), quia cæcitas ex parte contigit in Israel, donec plenitudo gentium intraret ;
Nolo enim vos ignorare fratres mysterium hoc ut non sitis vobis ipsis sapientes quia caecitas ex parte contigit in Israhel donec plenitudo gentium intraret.
26 Et sic omnis Israel salvus fieret, sicut scriptum est : Veniet ex Sion qui eripiat, avertet impietates a Jacob.
Et sic omnis Israhel salvus fieret sicut scriptum est veniet ex Sion qui eripiat avertet impietates ab Iacob.
27 Et hoc illis a me testamentum, cum abstulero peccata eorum.
Et hoc illis a me testamentum cum abstulero peccata eorum.
28 Secundum Evangelium quidem, inimici propter vos ; secundum electionem autem, carissimi propter patres.
Secundum evangelium quidem inimici propter vos secundum electionem autem carissimi propter patres.
29 Sine pœnitentia enim sunt dona et vocatio Dei.
Sine paenitentia enim sunt dona et vocatio Dei.
30 Sicut enim aliquando et vos non credidistis Deo, nunc autem misericordiam consecuti estis, propter incredulitatem illorum ;
Sicut enim aliquando et vos non credidistis Deo nunc autem misericordiam consecuti estis propter illorum incredulitatem.
31 Ita et isti nunc non crediderunt in vestram misericordiam, ut et ipsi misericordiam consequantur.
Ita et isti nunc non crediderunt in vestram misericordiam ut et ipsi misericordiam consequantur.
32 Conclusit enim Deus omnia in incredulitatem, ut omnium misereatur.
Conclusit enim Deus omnia in incredulitatem ut omnium misereatur.
33 O altitudo divitiarum sapientiæ, et scientiæ Dei ! quan incomprehensibilia sunt judicia ejus, et investigabiles viæ ejus !
O altitudo divitiarum sapientiae et scientiae Dei quam inconprehensibilia sunt iudicia eius et investigabiles viae eius.
34 Quis enim cognovit sensum Domini ? aut quis consiliarius ejus fuit ?
Quis enim cognovit sensum Domini aut quis consiliarius eius fuit.
35 Aut quis prior dedit illi, et retribuetur ei ?
Aut quis prior dedit illi et retribuetur ei.
36 Quoniam ex ipso, et per ipsum, et in ipso sunt omnia ; ipsi gloria in secula ! Amen.
Quoniam ex ipso et per ipsum et in ipso omnia ipsi gloria in saecula amen.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org — Nova Vulgata Bibliorum Sacrorum Editio.
