19 Et factum est, cum consummasset Jesus sermones istos, migravit a Galilæa, et venit in fines Judææ trans Jordanem,
Et factum est cum consummasset Iesus sermones istos migravit a Galilaea et venit in fines Iudaeae trans Iordanen.
2 Et secutæ sunt eum turbæ multæ, et curavit eos ibi.
Et secutae sunt eum turbae multae et curavit eos ibi.
3 Et accesserunt ad eum pharisæi tentantes eum, et dicentes : Si licet homini dimittere uxorem suam, quacumque ex causa ?
Et accesserunt ad eum Pharisaei temptantes eum et dicentes si licet homini dimittere uxorem suam quacumque ex causa.
4 Qui respondens, ait eis : Non legistis, quia qui fecit hominem ab initio, masculum, et feminam fecit eos ? Et dixit :
Qui respondens ait eis non legistis quia qui fecit ab initio masculum et feminam fecit eos et dixit.
5 Propter hoc dimittet homo patrem, et matrem, et adhærebit uxori suæ, et erunt duo in carne una ;
Propter hoc dimittet homo patrem et matrem et adherebit uxori suae et erunt duo in carne una.
6 Itaque jam non sunt duo, sed una caro. Quod ergo Deus conjunxit, homo non separet.
Itaque iam non sunt duo sed una caro quod ergo Deus homo non separet.
7 Dicunt illi : Quid ergo Moyses mandavit dare libellum repudii, et dimittere ?
Dicunt illi quid ergo Moses mandavit dari libellum repudii et dimittere.
8 Ait illis : Quoniam Moyses ad duritiam cordis vestri permisit vobis dimittere uxores vestras ; ab initio autem non fuit sic.
Ait illis quoniam Moses ad duritiam cordis vestri permisit vobis dimittere uxores vestras ab initio autem non sic fuit.
9 Dico autem vobis, quia quicumque dimiserit uxorem suam, nisi ob fornicationem, et aliam duxerit, mœchatur ; et qui dimissam duxerit, mœchatur.
Dico autem vobis quia quicumque dimiserit uxorem suam nisi ob fornicationem et aliam duxerit moechatur et qui dimissam duxerit moechatur.
10 Dicunt ei discipuli ejus : Si ita est causa hominis cum uxore, non expedit nubere.
Dicunt ei discipuli eius si ita est causa homini cum uxore non expedit nubere.
11 Qui dixit illis : Non omnes capiunt verbum istud, sed quibus datum est.
Qui dixit non omnes capiunt verbum istud sed quibus datum est.
12 Sunt enim eunuchi, qui de matris utero sic nati sunt ; et sunt eunuchi, qui facti sunt ab hominibus ; et sunt eunuchi, qui seipsos castraverunt propter regnum cælorum : Qui potest capere, capiat.
Sunt enim eunuchi qui de matris utero sic nati sunt et sunt eunuchi qui facti sunt ab hominibus et sunt eunuchi qui se ipsos castraverunt propter regnum caelorum qui potest capere capiat.
13 Tunc oblati sunt ei parvuli, ut manus eis imponeret, et oraret. Discipuli autem increpabant eos.
Tunc oblati sunt ei parvuli ut manus eis inponeret et oraret discipuli autem increpabant eis.
14 Jesus vero ait eis : Sinite parvulos, et nolite eos prohibere ad me venire ; talium est enim regnum cælorum.
Iesus vero ait eis sinite parvulos et nolite eos prohibere ad me venire talium est enim regnum caelorum.
15 Et cum imposuisset eis manus, abiit inde.
Et cum inposuisset eis manus abiit inde.
16 Et ecce unus accedens, ait illi : Magister bone, quid boni faciam ut habeam vitam æternam ?
Et ecce unus accedens ait illi magister bone quid boni faciam ut habeam vitam aeternam.
17 Qui dixit ei : Quid me interrogas de bono ? Unus est bonus Deus. Si autem vis ad vitam ingredi, serva mandata.
Qui dixit ei quid me interrogas de bono unus est bonus Deus si autem vis ad vitam ingredi serva mandata.
18 Dicit illi : Quæ ? Jesus autem dixit : Non homicidium facies ; Non adulterabis ; Non facies furtum ; Non falsum testimonium dices ;
Dicit illi quae Iesus autem dixit non homicidium facies non adulterabis non facies furtum non falsum testimonium dices.
19 Honora patrem tuum, et matrem tuam ; et diliges proximum tuum sicut teipsum.
Honora patrem et matrem et diliges proximum tuum sicut te ipsum.
20 Dicit illi adolescens : Omnia hæc custodivi a juventute mea, quid adhuc mihi deest ?
Dicit illi adulescens omnia haec custodivi quid adhuc mihi deest.
21 Ait illi Jesus : Si vis perfectus esse, vade, vende quæ habes, et da pauperibus, et habebis thesaurum in cælo ; et veni, sequere me.
Ait illi Iesus si vis perfectus esse vade vende quae habes et da pauperibus et habebis thesaurum in caelo et veni sequere me.
22 Cum audisset autem adolescens verbum, abiit tristis ; erat enim habens multas possessiones.
Cum audisset autem adulescens verbum abiit tristis erat enim habens multas possessiones.
23 Jesus autem dixit discipulis suis : Amen dico vobis, quia dives difficile intrabit in regnum cælorum.
Iesus autem dixit discipulis suis amen dico vobis quia dives difficile intrabit in regnum caelorum.
24 Et iterum dico vobis : Facilius est camelum per foramen acus transire, quam divitem intrare in regnum cælorum.
Et iterum dico vobis facilius est camelum per foramen acus transire quam divitem intrare in regnum caelorum.
25 Auditis autem his, discipuli mirabantur valde, dicentes : Quis ergo poterit salvus esse ?
Auditis autem his discipuli mirabantur valde dicentes quis ergo poterit salvus esse.
26 Aspiciens autem Jesus, dixit illis : Apud homines hoc impossibile est ; apud Deum autem omnia possibilia sunt.
Aspiciens autem Iesus dixit illis apud homines hoc inpossibile est apud Deum autem omnia possibilia sunt.
27 Tunc respondens Petrus, dixit ei : Ecce nos reliquimus omnia, et secuti sumus te ; quid ergo erit nobis ?
Tunc respondens Petrus dixit ei ecce nos reliquimus omnia et secuti sumus te quid ergo erit nobis.
28 Jesus autem dixit illis : Amen dico vobis, quod vos, qui secuti estis me, in regeneratione cum sederit Filius hominis in sede majestatis suæ, sedebitis et vos super sedes duodecim, judicantes duodecim tribus Israel.
Iesus autem dixit illis amen dico vobis quod vos qui secuti estis me in regeneratione cum sederit Filius hominis in sede maiestatis suae sedebitis et vos super sedes duodecim iudicantes duodecim tribus Israhel.
29 Et omnis, qui reliquerit domum, vel fratres, aut sorores, aut patrem, aut matrem, aut uxorem, aut filios, aut agros propter nomen meum, centuplum accipiet, et vitam æternam possidebit.
Et omnis qui reliquit domum vel fratres aut sorores aut patrem aut matrem aut uxorem aut filios aut agros propter nomen meum centuplum accipiet et vitam aeternam possidebit.
30 Multi autem erunt primi novissimi, et novissimi primi.
Multi autem erunt primi novissimi et novissimi primi.
Hieronymus Vulgata (IntraText Edition - Concordantiæ biblicæ plenæ) || Vulgatæ Editionis, Sixti V et Clementis VIII, Anno 2009, R. Conte Editore : SacredBible.org — Nova Vulgata Bibliorum Sacrorum Editio.
